Ռուս քաղաքագետ Դմիտրի Սուսլովը Հանրային հեռուստատեսությանը տված հարցազրույցում խոսել է Ռուսաստանի Դաշնության «կարմիր գծերի» մասին, բացատրել, թե ինչու Ռուսաստանը ամպագոռգոռ հայտարարություններ չի անում, չի կարող բաց առճակատման գնալ Թուրքիայի հետ և զգուշացրել է Հայաստանի համար սերբական Կրայինայի սցենարի մասին՝ Ռուսաստանի Դաշնությունից «երես թեքելու» դեպքում։
Հայաստանի սահմանները Ռուսաստանի համար «կարմիր գիծ» են
«Հայաստանի սահմանները, անխոս, «կարմիր գիծ» են Ռուսաստանի համար, քանի որ Ռուսաստանի Դաշնությունը և Հայաստանը Հավաքական անվտանգության պայմանագրի կազմակերպության անդամներ են»,- ասել է Սուսլովը։
Նա մեկնաբանել է այն կարծիքը, որ բոլոր երկրներն ակտիվորեն աջակցում են Հայաստանին և տեղի ունեցողը որակում են որպես օկուպացիա Ադրբեջանի կողմից։
«Ռուսաստանը կարող է և չարտաբերել «օկուպացիա» բառը: Երբ Արևմուտքը հռետորական մակարդակով շատ ավելի մեծ աջակցություն է հայտնում Հայաստանին, քան Ռուսաստանը, դա չի նշանակում, որ Արևմուտքն իսկապես աջակցում է Հայաստանին, հանձնառու է պաշտպանել Հայաստանը և ապահովել նրա անվտանգությունն»,- ասել է Սուսլովը։
Նրա խոսքով, դա նշանակում է, որ Արևմուտքը պարզապես ցանկանում է թուլացնել ռուս-հայկական հարաբերությունները և Ռուսաստանի ներկայությունը հարավկովկասյան տարածաշրջանում։ Այսինքն՝ Արևմուտքը հետապնդում է «իր սեփական եսասիրական շահերը և ցանկանում է Հայաստանը դարձնել ռուս-արևմտյան մրցակցության հերթական ասպարեզ՝ Ռուսաստանին թուլացնելու համար»։
«Ռուսաստանի իշխանությունները չեն օգտագործում «օկուպացիա» և «ագրեսիա» բառերը, ես՝ որպես փորձագետ, ասում եմ․ Ռուսաստանը հայտարարել է, որ պատրաստ է երկօրյա ժամկետում սահմանին տեղակայել ՀԱՊԿ-ի դիտորդական առաքելություն, ինչն, իսկապես կկանխի Ադրբեջանի կողմից, առնվազն, լայնածավալ, ուժի կիրառման, հրետակոծության և այլնի դեպքերը, տարածքների գրավումը»,- ասել է Սուսլովը։
