ՌԴ ԱԳՆ պաշտոնական ներկայացուցիչ Մարիա Զախարովան ուրբաթ օրը կայացած ճեպազրույցում ներկայացրել է Ռուսաստանի դիրքորոշումը Բաքու-Երևան-Թբիլիսի երկխոսության վերաբերյալ։
Հարավային Կովկասում և Վրաստանում ԵՄ հատուկ ներկայացուցիչ Տոյվո Կլաարը երեկ ասել է, որ Եվրամիությունն աջակցում է Վրաստանի միջնորդությանը Հայաստանի և Ադրբեջանի միջև բանակցություններում։
«Յուրաքանչյուր պետություն իրավունք ունի մասնակցել այն միջազգային ձևաչափերին, որոնք համապատասխանում են իր շահերին և ուղղված չեն երրորդ երկրների դեմ, ինչպես նաև հաշվի են առնում ուժերի առկա հավասարակշռությունը։ Եթե Բաքու-Երևան-Թբիլիսի եռակողմ երկխոսությունը կնպաստի Անդրկովկասում հակասությունների կարգավորմանը, տարածաշրջանում կայունության և անվտանգության ամրապնդմանը, ապա մենք կարող ենք միայն ողջունել դա»,- ասել է Զախարովան։
Սակայն, նշել է նա, եթե այս նախաձեռնության հետևում նկատվում են Վաշինգտոնի և Բրյուսելի ուրվագծերը, որոնք ձգտում են խաթարել Հայաստանի, Ադրբեջանի և Ռուսաստանի ղեկավարների միջև եռակողմ պայմանավորվածությունների կատարումը, ապա դա բոլորովին այլ պատմություն
«Ուզում եմ հիշեցնել, որ երեք երկրների՝ Ռուսաստանի, Ադրբեջանի և Հայաստանի ղեկավարների նշված պայմանավորվածություններն են, որոնք հիմք են հանդիսանում Բաքվի և Երևանի միջև հարաբերությունների կարգավորման համար, Երևանի և Բաքվի միջև հարաբերությունների կարգավորման համար։ Այս ձևաչափի շրջանակներում 2020 թվականից սկսած առանցքային գործընթացներ են սկսվել հաղորդակցությունների ապաշրջափակման, հայ-ադրբեջանական սահմանի սահմանազատման, խաղաղության պայմանագրի մշակման, ինչպես նաև հասարակական, փորձագիտական և խորհրդարանական շրջանակների ներկայացուցիչների միջև կապերի հաստատման ուղղությամբ»,- ասել է Զախարովան։
Ինչ վերաբերում է Անդրկովկասում ձևաչափերին, ապա նա մատնանշել է 3+3 խորհրդատվական-տարածաշրջանային հարթակը, որն ընդգրկում է Անդրկովկասի երեք պետություններին, ինչպես նաև Ռուսաստանին, Թուրքիային և Իրանին։
«Այս մեխանիզմը հնարավորություն է տալիս համատեղել տարածաշրջանի ավելի լայն շրջանակի երկրների շահերը։ Սա նաև պետք նպաստի նրանց միջև առկա հակասությունների վերացմանը, առևտրատնտեսական, տրանսպորտային, մշակութային ու հումանիտար կապերի զարգացմանը, ընդհանուր մարտահրավերների և սպառնալիքների դեմ պայքարին»,- ասել է Զախարովան։