Հայաստանի խորհրդարանի փոխնախագահ Ռուբեն Ռուբինյանը նշանակվել է Հայաստանի և Թուրքիայի միջև երկխոսության գործընթացի հատուկ ներկայացուցիչ՝ վարչապետ Նիկոլ Փաշինյանի և նրա թիմի հետ ունեցած կապերի պատճառով։ Այս մասին Հայաստանի Հանրային հեռուստաընկերությանը տված հարցազրույցում ասել է Անվտանգության խորհրդի քարտուղար Արմեն Գրիգորյանը։
«Պարոն Ռուբինյանը ունի փորձ․ ԱԺ-ում ղեկավարել է արտաքին հարաբերությունների հանձնաժողովը, նաև մասնագիտացած է այս ոլորտում։ Կա նաև լրացուցիչ գործոն, որն ավելի արդյունավետ է դարձնում Ռուբինյանին որպես բանակցող․ ընդհանուր կապ վարչապետի և թիմային կապ», - ասել է նա։
Հարցին, արդյո՞ք ավելի լավ չքր լինի ընտրել հատուկ ներկայացուցիչ հաշվի առնելով ոչ թե թիմի հետ ունեցած կապերն, այլ դիվանագիտական փորձը, Գրիգորյանն ասել է, որ կապերը շատ ավելի կարևոր են, քանի որ «բանակցային գործընթացի ընթացքում կարող է ցանկացած հարց առաջանալ, որն արագ պարզաբանում կպահանջի երկրի ղեկավարի հետ»։
«Պարոն Ռուբինյանի մասնակցությունը մենք համարեցինք ավելի արդյունավետ, և որոշումն ընդունվեց նաև դրա հիման վրա։ Ինչ վերաբերում է հմուտ դիվանագետի մասին ընդհանուր պատկերացումներին, ապա կարծում եմ, որ ժամանակակից դիվանագիտությունը բազմաթիվ փոփոխություններ է կրում, և կարիք չկա արդի գործընթացների մասին հին գաղափարներով դատել»,- ասել է նա։
Դեկտեմբերի 13-ին Թուրքիայի արտգործնախարար Մևլութ Չավուշօղլուն ասել է, որ Թուրքիան և Հայաստանը կարող են հատուկ ներկայացուցիչներ նշանակել երկկողմ հարաբերությունները կարգավորելու համար։ Ավելի ուշ Չավուշօղլուն հայտարարեց ԱՄՆ-ում Թուրքիայի նախկին դեսպան Սերդար Քըլըչին հատուկ ներկայացուցիչ նշանակելու մասին։ Մի քանի օր անց՝ դեկտեմբերի 18-ին, Հայաստանի ԱԳՆ-ն հայտարարեց, որ Թուրքիայի հետ երկխոսության գործընթացում Հայաստանի հատուկ ներկայացուցիչ է նշանակվել ՀՀ ԱԺ փոխխոսնակ Ռուբեն Ռուբինյանը։