Հայաստանի Անվտանգության խորհրդի քարտուղար Արմեն Գրիգորյանն ուրբաթ օրը ՀԱՊԿ գլխավոր քարտուղար Իմանգալի Տասմագամբետովի հետ քննարկել է կազմակերպության պատասխանատվության գոտում ստեղծված իրավիճակը։ Այս մասին հայտնում է ԱԽ մամուլի ծառայությունը։
Գրիգորյանը ներկայացրել է իրավիճակը հայ-ադրբեջանական սահմանին. Կողմերը քննարկել են նաև Ադրբեջանի նախագահի՝ նախօրեին արված հայտարարությունը, նշելով, որ այն հակասում է Պրահայում և Սոչիում արված հայտարարություններին։
Նախօրեին Հայաստանի արտգործնախարարությունը հայտարարել էր, որ մարտի 16-ին Թյուրքական պետությունների ղեկավարների գագաթնաժողովի ընթացքում Ադրբեջանի նախագահ Իլհամ Ալիևի ելույթը Հայաստանի Հանրապետության նկատմամբ տարածքային պահանջների և հերթական ագրեսիայի նախապատրաստման բացահայտ դրսևորում էր։ «Հայաստանի Հանրապետության ինքնիշխան տարածքը ներկայացնելով «Արևմտյան Ադրբեջան» մտացածին անվան տակ՝ Ադրբեջանի նախագահը կոպտորեն խախտում է ոչ միայն ՄԱԿ կանոնադրությունը, Պետությունների միջև բարիդրացիական հարաբերությունների և համագործակցության միջազգային իրավունքի սկզբունքների վերաբերյալ ՄԱԿ ԳԱ հռչակագիրը, Ալմաթայի հռչակագիրը, այլ նաև Պրահայի և Սոչիի հայտարարություններով իր իսկ ստանձնած պարտավորությունները, որոնց հղում է արվում հենց այս ելույթում»,- ասված է հայտարարության մեջ։