Եվրամիությունն ակնկալում է, որ Իրանի միջուկային ծրագրի շուրջ Համատեղ համապարփակ գործողությունների ծրագրի (ՀՀԳԾ) վերականգնման վերաբերյալ որոշումը կարող է ընդունվել արդեն այս շաբաթ։ Նման կարծիքը չորեքշաբթի հայտնել է իսպանական El País թերթը, գրում է ՏԱՍՍ-ը։
Նրա տեղեկություններով, ինչպես կարծում են եվրոպական աղբյուրները, Թեհրանի արձագանքը Բրյուսելի վերջին առաջարկին ողջամիտ է։ Դեռևս պետք է սպասել ԱՄՆ-ի և Մեծ Բրիտանիայի դիրքորոշումներին։ Եվրամիությունը լավատեսորեն է տրամադրված նաև ժամկետների հարցում. գործարք կարող է ուրբաթ օրը կնքվել, գրում է թերթը։ Նրա կարծիքով, ժամանակը հարմար է, հաշվի առնելով ԱՄՆ-ում աշնանը սպասվող ընտրությունները։
Ինչպես ավելի վաղ հայտնել էր Agence France-Presse-ը, ԵՄ-ն գործընկերների հետ խորհրդակցություններ է անցկացնում Բրյուսելի՝ ՀՀԳԾ-ի վերականգնման առաջարկներին Թեհրանի արձագանքի շուրջ: Երկուշաբթի օրը Իրանը պատասխան է ուղարկել ՀՀԳԾ-ի վերականգնման վերաբերյալ ԵՄ առաջարկներին։ Ինչպես երեքշաբթի օրը հաղորդել է Politico-ն, վկայակոչելով արևմտյան մի պաշտոնյայի, Թեհրանի ուղերձի առանցքում պատժամիջոցների և տնտեսական երաշխիքների հարցերն են։ Օգոստոսի 11-ին The Wall Street Journal-ը գրել էր, որ ԵՄ դիվանագետները մշակել են Իրանի հետ միջուկային գործարքի վերականգնման վերաբերյալ փաստաթղթի վերջնական տեքստը։ Ըստ թերթի՝ Բրյուսելը Թեհրանին զիջումներ է առաջարկել ՄԱԳԱՏԷ-ի կողմից հայտնաբերված միջուկային նյութի հետաքննության հարցում, որի ծագումը իրանական կողմը չի պարզաբանել։
Իրանի հետ ՀՀԳԾ-ն ստորագրվել է 2015 թվականին ՄԱԿ-ի Անվտանգության խորհրդի մշտական «հնգյակի» և Գերմանիայի կողմից՝ Իրանի միջուկային մշակումների հետ կապված ճգնաժամը հաղթահարելու նպատակով: 2018 թվականին Միացյալ Նահանգների այն ժամանակվա նախագահ, հանրապետական Դոնալդ Թրամփը որոշեց դուրս գալ այս համաձայնագրից։ ԱՄՆ գործող նախագահ Ջո Բայդենը բազմիցս ազդակներ է ուղարկել Թեհրանի հետ միջուկային համաձայնագրին վերադառնալու Վաշինգտոնի պատրաստակամության մասին: Ռուսաստանը, Մեծ Բրիտանիան, Գերմանիան, Չինաստանը, ԱՄՆ-ն և Ֆրանսիան անցած տարվա ապրիլից Վիեննայում բանակցություններ են վարում Իրանի հետ՝ ՀՀԳԾ-ն իր սկզբնական տեսքով վերականգնելու շուրջ։