ՄԱԿ Անվտանգության խորհուրդը նամակ է ստացել Հայաստանի մշտական ներկայացուցչից՝ «Ադրբեջանի ագրեսիայի հետ կապված» Անվտանգության խորհրդի արտակարգ նիստ հրավիրելու խնդրանքով, «ՌԻԱ Նովոստի»-ին հայտնել է Անվտանգության խորհրդի աղբյուրը։
«Անվտանգության խորհուրդն այսպիսի նամակ է ստացել Հայաստանի առաքելությունից»,- ասել է գործակալության զրուցակիցը։ Նամակում, որի պատճենը ՌԻԱ Նովոստիի տրամադրության տակ է, ասվում է, որ ՀՀ ԱԳՆ ղեկավարի հանձնարարությամբ ՄԱԿ-ում Հայաստանի մշտական ներկայացուցիչ Մհեր Մարգարյանը խնդրում է «հրավիրել ՄԱԿ Անվտանգության խորհրդի արտակարգ նիստ՝ ․․․ կապված 2022 թվականի սեպտեմբերի 13-ին Հայաստանի Հանրապետության դեմ Ադրբեջանի սանձազերծած լայնածավալ ագրեսիայի, որն անմիջական վտանգ է ներկայացնում միջազգային խաղաղության և անվտանգության համար»։
Երեքշաբթի գիշերը հայ-ադրբեջանական սահմանին ռազմական գործողություններ են սկսվել, կողմերը միմյանց մեղադրում են սրումը սկսելու մեջ։ Երևանը հայտարարել է, որ ադրբեջանական զինուժը հրետանու և անօդաչու թռչող սարքերի կիրառմամբ հրետակոծել է Հայաստանի տարածքը։ Հրետակոծման են ենթարկվել սահմանամերձ շրջանները՝ Գեղարքունիքի, Վայոց ձորի, Սյունիքի մարզերը (Հայաստանը կապում է Իրանի հետ)։ Այդ տարածքներն առնչություն չունեն Ղարաբաղի հետ։ Բաքուն հայտարարել է, որ հայ զինվորականները կրակել են սահմանին ադրբեջանական զորքերի դիրքերի ուղղությամբ, բախում է տեղի ունեցել. Ադրբեջանի ԱԳՆ-ն Հայաստանին մեղադրել է խաղաղ գործընթացը խաթարելու մտադրության մեջ։ Երկու կողմերն էլ հայտնել են իրենց զինվորականների շրջանում զոհերի մասին։
Առավոտյան կողմերը պայմանավորվել են հրադադարի մասին։ Ինչպես ՌԻԱ Նովոստիին ասել է ՌԴ Դաշնային խորհրդի միջազգային կոմիտեի ղեկավար Գրիգորի Կարասինը, Հայաստանի և Ադրբեջանի միջև սահմանին զինադադարը ձեռք է բերվել Ռուսաստանի ջանքերի շնորհիվ, այդ թվում՝ ՌԴ նախագահ Վլադիմիր Պուտինի և Հայաստանի վարչապետ Նիկոլ Փաշինյանի հեռախոսազրույցից և ՌԴ ԱԳՆ աշխատանքից հետո։ Սենատորի խոսքով, շատ անելիքներ կան, քանի որ Երևանը դիմել է ՀԱՊԿ-ին։ Ինչպես ավելի վաղ հայտնել էր ՀԱՊԿ մամլո քարտուղար Վլադիմիր Զայնետդինովը, սեպտեմբերի 13-ին տեղի է ունեցել ՀԱՊԿ Մշտական խորհրդի արտակարգ նիստ, որում ծայրահեղ մտահոգություն է արտահայտվել Հայաստանի և Ադրբեջանի սահմանին տիրող իրավիճակի վերաբերյալ և քննարկվել են ՀԱՊԿ կարգավորման մեխանիզմների կիրառման առաջարկները։