ՌԴ նախագահ Վլադիմիր Պուտինի՝ ԴԺՀ-ն և ԼԺՀ-ն ճանաչելու որոշումից հետո ԱՄՆ-ն որոշել է ժամանակավորապես Լեհաստան տեղափոխել Ուկրաինայում իր դեսպանությունը, հայտնում է РБК-ն՝ հղում անելով իր աղբյուրը վկայակոչած Bloomberg-ին։
Դեսպանությունն ի սկզբանե գտնվում էր Կիևում, սակայն Դոնբասում իրավիճակի վատթարացման պատճառով այն տեղափոխվեց Ուկրաինայի արևմտյան հատված՝ Լվով։ Այժմ դիվանագիտական առաքելության անձնակազմը ժամանակավորապես տեղափոխվում է Լեհաստան, գրում է գործակալությունը։ Համապատասխան հրամանը տրվել է անվտանգության նկատառումներից ելնելով, ասել է աղբյուրը։
Գործակալության աղբյուրի խոսքով՝ եթե Ռուսաստանը ներխուժում չսկսի, ապա երեքշաբթի առավոտյան դեսպանատան աշխատակիցները կվերադառնան Լվով։
Բացի այդ, Լվովը «որքան հնարավոր է շուտ» կլքեն Ավստրալիայի դեսպանության աշխատակիցները։ Նրանք նույնպես մոտ երկու շաբաթ առաջ Կիևից մեկնել էին Արևմտյան Ուկրաինա, իսկ այժմ կտեղափոխվեն Վարշավայում Ավստրալիայի դեսպանատուն, հայտնում է ABC-ն։ Հեռարձակող կորպորացիայի տվյալներով՝ այժմ Լվովում Ավստրալիայի ԱԳՆ երեք աշխատակից կա։
Փետրվարի 12-ին Պետդեպարտամենտը հրամայել էր Կիևում գտնվող ոչ խիստ կարևոր պաշտոններ ունեցող ամերիկացի դիվանագետներին լքել Ուկրաինան: Գերատեսչությունում պարզաբանել էին, որ որոշումը կայացրել են կապված Ուկրաինա ռուսական զորքերի ներխուժման աճող սպառնալիքի հետ։ Երկու օր անց պետքարտուղար Էնթոնի Բլինկենը հայտարարեց, որ Վաշինգտոնը որոշել է դեսպանությունը Կիևից ժամանակավորապես տեղափոխել Լվով։
Փետրվարի 21-ին ՌԴ նախագահ Վլադիմիր Պուտինը հայտարարեց Դոնեցկի և Լուգանսկի ժողովրդական հանրապետությունների ինքնիշխանության ճանաչման մասին։ Նրանց ղեկավարների հետ ստորագրվել են բարեկամության, համագործակցության և փոխօգնության պայմանագրեր։ Ավելի ուշ Պուտինը արտաքին գործերի նախարարությանը հանձնարարեց դիվանագիտական հարաբերություններ հաստատել ԴԺՀ-ի և ԼԺՀ-ի հետ, իսկ պաշտպանության նախարարությանը՝ այդ տարածքներում խաղաղություն ապահովել։ Ինչպես նշված է նախագահի հրամանագրերից մեկում, ռազմական գերատեսչությանը հանձնարարվել է «ՌԴ ԶՈւ-ի կողմից խաղաղապահ գործառույթներ իրականացնել Դոնեցկի և Լուգանսկի հանրապետություններում»՝ մինչև բարեկամության, համագործակցության և փոխօգնության մասին համաձայնագրի կնքումը։ Նույն կերպ է ձևակերպված ՌԴ ՊՆ-ին տված կարգադրությունը ԼԺՀ-ի անկախությունը ճանաչելու մասին հրամանագրում.