Նման իրավիճակներ չպետք է կրկնվեն, անդրադառնալով Լաչինի միջանցքի արգելափակմանը հայտարարեց Ազգային ժողովի արտաքին հարաբերությունների մշտական հանձնաժողովի նախագահ, իշխող «Քաղաքացիական պայմանագիր» խմբակցության պատգամավոր Էդուարդ Աղաջանյանը։
Շաբաթ օրը հաղորդվեց, որ Շուշի-Քարին տակ խաչմերուկի հատվածում քաղաքացիական հագուստներով մի խումբ ադրբեջանցիներ բնապահպանական պատճառաբանությամբ փակել էին Ստեփանակերտ-Գորիս մայրուղին, դրանով իսկ կտրելով Արցախի կապը Հայաստանի և Շուշիի շրջանի Բերդաշեն ենթաշրջանի գյուղերի հետ։
«Ռուս խաղաղապահների հետ պետք է անենք ամեն ինչ, որ նման բան չկրկնվի»,- ասաց Աղաջանյանը։
Նա նշեց, որ Հայաստանի, Ռուսաստանի և Ադրբեջանի ղեկավարների եռակողմ հայտարարության համաձայն Լաչինի միջանցքը պետք է գործի միայն ռուս խաղաղապահների վերահսկողության ներքո, և այն, ինչ տեղի է ունեցել, անընդունելի է։
Միևնույն ժամանակ Աղաջանյանը նշեց, որ այս պահին տեղեկություն չունի, թե երբ պատրաստ կլինի այլընտրանքային ճանապարհը։