The Washington Post-ի փոխանցմամբ՝ եվրոպական հետախուզությունը փաստաթուղթ է ստացել, որը պարունակում է Ռուսաստանի կոշտ բանակցային դիրքորոշումները։ Հրատարակության տվյալներով՝ փաստաթուղթը պատրաստվել է վերլուծական կենտրոնի կողմից, որը կապված է ԱԴԾ հինգերորդ ծառայության հետ, որը վերահսկում է գործողությունները Ուկրաինայում, և նախատեսված է եղել Կրեմլի համար։ Այն կազմվել է փետրվարի 18-ին Էր Ռիադում Ռուսաստանի ու ԱՄՆ-ի բանակցություններից մեկ շաբաթ առաջ։
Փաստաթուղթը անիրատեսական է համարում 100 օրվա ընթացքում խաղաղության հասնելու Դոնալդ Թրամփի ծրագրերը և ընդունում է, որ Ուկրաինայում հակամարտության կարգավորումն անհնար է մինչև 2026 թվականը։ Հեղինակները պնդում են, որ առանց Ռուսաստանի կազմում գրավված տարածքների պաշտոնական ճանաչման, պատերազմը կարող է վերսկսվել, օրինակ, եթե ԱՄՆ-ում վարչակազմը փոխվի:
Փաստաթղթում շարադրված պահանջների թվում են օկուպացված շրջանների նկատմամբ Ռուսաստանի ինքնիշխանության ճանաչումը, Ուկրաինայի հյուսիս-արևելքում բուֆերային գոտու ստեղծումը Բրյանսկի և Բելգորոդի շրջանների հետ սահմանի երկայնքով, ինչպես նաև ապառազմականացված գոտի հարավային շրջաններում, ներառյալ Օդեսան: Փաստաթղթի հեղինակներն անբավարար են համարում Ուկրաինայի կողմից հնարավոր զիջումները, ինչպիսիք են ՆԱՏՕ-ին անդամակցելուց հրաժարվելը և ռուսամետ կուսակցությունների մասնակցությամբ ընտրությունների անցկացումը։
«Իրականում Կիևի ներկայիս ռեժիմը ներսից փոխելն անհնար է։ «Այն պետք է ամբողջությամբ ապամոնտաժվի», - մեջբերում է The Washington Post-ը փաստաթղթից մի հատված:
Բացի այդ, ցանկացած խաղաղապահ ուժ, անկախ նրանց ծագումից, փաստաթղթում անվանվում է անցանկալի՝ «արևմտյան ազդեցությանը» ենթարկվելու վտանգի պատճառով։
Կրեմլի խոսնակ Դմիտրի Պեսկովը հրապարակմանը ասել է, որ ինքը «անտեղյակ է նման առաջարկություններին», և որ Ռուսաստանի ղեկավարությունը «աշխատում է ավելի մտածված տարբերակների հետ»։
The Washington Post-ը նշում է նաեւ, որ փետրվարի վերջին Մոսկվայի որոշ գործողությունները համընկնում են փաստաթղթի դրույթների հետ։ Մասնավորապես, փետրվարի 24-ին Վլադիմիր Պուտինն առաջարկել է ԱՄՆ-ին օկուպացված ուկրաինական տարածքներում հազվագյուտ մետաղների հանքավայրերի համատեղ մշակում, իսկ ամերիկյան նոր վարչակազմի ներկայացուցիչների հետ առաջին բանակցություններում ռուսական կողմը կենտրոնացել է դիվանագիտական կապերի վերականգնման վրա։