Թուրքիան առաջարկել է Հայաստանի հետ հարաբերությունների կարգավորման ևս մեկ հանդիպում անցկացնել Անկարայում կամ Երևանում, սակայն մինչ այժմ արձագանք չի եղել, ՌԻԱ Նովոստիին հայտնել է Անկարայում դիվանագիտական աղբյուրը։
«Եթե մենք խոսում ենք երկու երկրների հարաբերությունների կարգավորման գործընթացի մասին, տրամաբանական կլինի, որ բանակցությունները տեղի ունենան առանց երրորդ երկրների, ուժերի մասնակցության։ Մենք առաջարկել ենք հանդիպում անցկացնել Անկարայում կամ Երևանում, բայց պատասխան դեռևս չենք ստացել»,- ասել է գործակալության աղբյուրը։
Նրա խոսքով, Թուրքիայի և Հայաստանի միջև հարաբերությունների կարգավորման խոչընդոտներից մեկը հայկական սփյուռքի ճնշումն է։
«Որոշ դեպքերում գործընթացը սաբոտաժի է ենթարկվում, սակայն մենք հուսով ենք, որ կարգավորման գործընթացը կշարունակվի»,- հավելել է աղբյուրը։
Հայաստանի վարչապետը երկուշաբթի օրը շնորհավորել է Թուրքիայի նախագահին՝ Կուրբան Բայրամի, իսկ նա, իր հերթին, գալիք Վարդավառի՝ Հիսուս Քրիստոսի Պայծառակերպության տոնի առթիվ։ Երկրների ղեկավարները կարևորել են երկրների միջև հարաբերությունների կարգավորման երկկողմ գործընթացը, որը կնպաստի նաև տարածաշրջանում խաղաղության և կայունության ամրապնդմանը։