Հայաստանում կպահպանվի խորհրդարանական կառավարման համակարգը։ Այս մասին հինգշաբթի կառավարության նիստից հետո լրագրողներին ասաց արդարադատության նախարար Գրիգոր Մինասյանը։
«Սահմանադրական փոփոխություններն ընթանում են բավականին նորմալ տեմպերով, տեղի են ունեցել լայն հանրային քննարկումներ, այս պահին արդեն որոշակի հայեցակարգային կետեր են սահմանվել․ դրանք վերաբերում են նախագահականի գերակայությանը, կառավարման համակարգի պահպանմանն ու բարեփոխմանը»,- ասաց Մինասյանը։
Նա նշեց, որ այժմ նոր հանձնաժողով է ձևավորվում, քանի որ նախորդը ժամանակին կատարել է իր լիազորությունները։
«Հաջորդ շաբաթ արդեն տեղի կունենա նոր անդամների ընտրություն՝ ապահովելու տեմպերը (հանձնաժողովի աշխատանքի-խմբ.)»,- ասաց նախարարը։
Մինասյանն ասաց, որ քննարկումների արդյունքները հնարավոր կլինի ներկայացնել առաջիկայում՝ գործունեության արդյունքներն ավելի մանրամասն ցուցադրելու համար։
Ինչ վերաբերում է վարչապետի լիազորություններին, ապա նա ասաց, որ այս փոփոխությունների քննարկումը նախատեսված է մարտի վերջին։
2022 թվականի նոյեմբերի 30-ին Հայաստանի սահմանադրական բարեփոխումների խորհուրդը ձայների մեծամասնությամբ կողմ քվեարկեց խորհրդարանական կառավարման մոդելի պահպանմանն ու կատարելագործմանը։
Անկախ Հայաստանի սահմանադրությունն ընդունվել է 1995 թվականի հուլիսի 5-ին։ Հիմնական օրենքում փոփոխություններ են կատարվել երկու անգամ՝ 2005 թվականի նոյեմբերի 27-ին և 2015 թվականի դեկտեմբերի 6-ին։ Հիմնական օրենքի վերջին տարբերակի համաձայն՝ Հայաստանը կիսանախագահականից անցել է խորհրդարանական կառավարման մոդելի։