Հայաստանի փոխվարչապետ Մհեր Գրիգորյանը հաստատել է, որ հաջորդ շաբաթ Մոսկվայում Հայաստանի, Ռուսաստանի և Ադրբեջանի փոխվարչապետների համանախագահությամբ տեղի կունենա տարածաշրջանում տրանսպորտային և տնտեսական կապերի ապաշրջափակման եռակողմ աշխատանքային խմբի նիստը, հայտնում է ՏԱՍՍ-ը։
«Այս հանդիպման կոնկրետ ժամկետն այժմ համաձայնեցման փուլում է, իսկ հանդիպման օրակարգում ներառված են Հայաստանի, Ռուսաստանի և Ադրբեջանի ղեկավարների 2020 թվականի նոյեմբերի 9-ի (10) և 2021 թվականի հունվարի 11-ի եռակողմ հայտարարության 9-րդ կետում նշված պայմանավորվածությունների կատարման հետ կապված հարցեր: Այս օրակարգը սահմանազատման հետ կապ չունի»,- հավելել է նա։
Գրիգորյանը կառուցողական է որակել Հայաստանի և Ադրբեջանի միջև սահմանազատման և սահմանային անվտանգության հարցերի հանձնաժողովների առաջին հանդիպումը, որը տեղի է ունեցել մայիսի 24-ին երկու երկրների սահմանին։
«Իրոք, մայիսի 24-ին մենք առաջին հանդիպումը անցկացրինք սահմանին, այս հանդիպմանը քննարկել ենք բացառապես հետագա համատեղ աշխատանքի հետ կապված կազմակերպչական հարցեր, և այս առումով հանդիպումը համարում եմ բավականին կառուցողական։ Հանձնաժողովների հաջորդ հանդիպման ժամկետների շուրջ պայմանավորվածություն դեռևս չկա, սակայն կա հաստատում, որ հանդիպումը կայանալու է Մոսկվայում»,- նշել է նա։
Սահմանների սահմանազատման հայ-ադրբեջանական հանձնաժողովի մասին
Սահմանազատման և սահմանների անվտանգության հանձնաժողովի համանախագահներ՝ Հայաստանի և Ադրբեջանի փոխվարչապետներ Մհեր Գրիգորյանի և Շահին Մուստաֆաևի առաջին հանդիպումը կայացել է մայիսի 24-ին հայ-ադրբեջանական միջպետական սահմանին։
Կողմերը հաստատել են իրենց պատրաստակամությունը աշխատելու սահմանների սահմանազատման և այլ համապատասխան հարցերի, այդ թվում՝ սահմանային անվտանգության հարցերի հանձնաժողովների շրջանակներում։ Քննարկվել են հանձնաժողովների համատեղ գործունեության կազմակերպչական և ընթացակարգային հարցեր։
Միջպետական սահմանին հանդիպումների հետ մեկտեղ կողմերը պայմանավորվել են հանձնաժողովների հետագա նիստերի անցկացման համար տարբեր հարթակներ օգտագործելու նպատակահարմարության շուրջ։ Մասնավորապես, պայմանավորվածություն է ձեռք բերվել երկրորդ հանդիպումն անցկացնել Մոսկվայում (հաջորդ շաբաթ), երրորդը՝ Բրյուսելում։