Ռուսաստանի Դաշնության պատվիրակությունը՝ Դաշնության խորհրդի փոխնախագահ Յուրի Վորոբյովի գլխավորությամբ, մարտի 16-18-ը կայցելի Հայաստան՝ մասնակցելու Ռուսաստանի Դաշնության Դաշնային ժողովի և Հայաստանի Հանրապետության Ազգային ժողովի միջև համագործակցության միջխորհրդարանական հանձնաժողովի 36-րդ նիստին, հայտնում է Դաշնության խորհրդի կայքը։
Ռուսական պատվիրակության կազմում են սենատորներ Վիկտոր Բոնդարևը, Դմիտրի Կուզմինը, Վալերի Սեմյոնովը և Անդրեյ Չերնիշևը, Պետդումայի պատգամավորներ, ՌԴ տնտեսական զարգացման նախարարության, ՌԴ կրթության նախարարության, ՌԴ ԱԳՆ-ի և «Ռոսսոտրուդնիչեստվոյի» ներկայացուցիչներ, միջխորհրդարանական հանձնաժողովին կից փորձագիտական խորհրդի անդամներ։
Նիստի օրակարգում են հումանիտար և տնտեսական ոլորտներում երկկողմ համագործակցության հարցերը, Հայաստանում ռուսաց լեզվի և Ռուսաստանում հայոց լեզվի ուսուցման աջակցության ապահովման ուղղությամբ հայ-ռուսական փոխգործակցության հեռանկարները:
Ծրագրով նախատեսված է մասնակցություն Արվեստի մանկապատանեկան դպրոցում ռուսական կենտրոնի բացմանը, ինչպես նաև այցելություններ ռուսաց լեզվի ուսումնասիրությամբ դպրոցներ։
