Ամեն բանակցություն չէ, որ կարող է արդյունավետ լինել, ուստի Թուրքիայի նախագահ Ռեջեփ Թայիփ Էրդողանը պետք է կոնկրետ պայմանավորվածություններ առաջարկի, որպեսզի Ռուսաստանը, Ադրբեջանը և Հայաստանը կարողանան հավաքվել Լեռնային Ղարաբաղի հարցով բանակցային սեղանի շուրջ։ Այս կարծիքը «Խոսում է Մոսկվան» ռադիոկայանին տված հարցազրույցում հայտնել է խորհրդարանի ստորին պալատի միջազգային հարաբերությունների հանձնաժողովի նախագահի առաջին տեղակալ Դմիտրի Նովիկովը։
Ռուս խորհրդարանականը կոչ է արել նախ սպասել ստույգ որոշմանը, թե արդյոք սկզբունքորեն տեղի կունենան բանակցություններ։ Նրա կարծիքով, դա կարող է դժվար լինել, քանի որ Բաքուն և Երևանը փոխում են իրենց կարծիքը բանակցությունների սեղանի շուրջ նստելու անհրաժեշտության մասին։ Նաև այս դեպքում Նովիկովը կոչ է անում ձևակերպել կոնկրետ պայմանավորվածություններ, որոնք պետք է ձեռք բերվեն հանդիպման ավարտին, հաղորդում է lenta.ru-ն։
«Հետևաբար, բանակցությունները հնարավոր և անհրաժեշտ են կամ այն դեպքում, երբ իրավիճակը լիովին սրված է, և չափազանց կարևոր է գոնե որևէ լուծում գտնել։ Այստեղ կարևոր չէ, թե որքան մեծ է պայմանավորվածությունների ձեռքբերման հնարավորությունը, կամ երբ կա կոնկրետ համաձայնագրի նախագիծ։ Եթե պարոն Էրդողանը, հետևելով իր գաղափարներին, նման առաջարկներ անի և կոնկրետացնի դրանք, ապա, հավանաբար, կողմերը լրացուցիչ փաստարկներ կստանան նման հանդիպման անցկացման օգտին»,- ասել է Նովիկովը։
Սեպտեմբերի 16-ին Էրդողանն ասել է, որ առաջարկել է քառակողմ հանդիպում անցկացնել Ռուսաստանի, Հայաստանի և Ադրբեջանի ղեկավարների հետ ղարաբաղյան հիմնախնդրի շուրջ։ Նրա խոսքով՝ Անկարան դեռ պատասխան չի ստացել կողմերից ոչ մեկից։
