ԱՄՆ Ներկայացուցիչների պալատում Արցախի շրջափակման դեմ բանաձևի նախագիծ է ներկայացրել, որը նպատակ ունի մեծացնել ԱՄՆ-ի ճնշումը Ադրբեջանի նկատմամբ, որպեսզի Բաքուն վերջ տա իրենց պատմական հայրենիքում 120 հազար արցախցիների երկու ամիս շարունակվող շրջափակումը։
Ամերիկայի Հայ դատի հանձնախումբը (ANCA) հայտնում է, որ երկկուսակցական օրինագծին արդեն իր աջակցությունն է հայտնել 65 կոնգրեսական։
Փաստաթղթի համահեղինակները ուղղակիորեն նշում են հումանիտար այս ճգնաժամի համար Ադրբեջանին պատասխանատվության ենթարկելու անհրաժեշտությունը։ Նրանք ընդգծում են, որ Արցախում հայ ժողովրդի նկատմամբ Ադրբեջանի ագրեսիան անընդունելի է և ոչ միայն խախտում է միջազգային պայմանագրերն, այլև խոչընդոտում է մարդկանց սննդամթերքով, դեղորայքով և այլ առաջին անհրաժեշտության ապրանքներով մատակարարմանը։
«Ալիևի ռեժիմը կանխամտածված քայլեր է ձեռնարկում բնիկ հայերին Արցախից հեռացնելու համար և նրանց զրկելու իրենց նախնիների երկրում ազատ, ժողովրդավարական և արժանապատիվ ապրելու հնարավորությունից։ Այս ամենը էթնիկ զտումների ակնհայտ նշան է, որը մենք չենք կարող անտեսել… Միացյալ Նահանգները պետք է անհապաղ գործի և օգտագործի բոլոր հասանելի դիվանագիտական գործիքները միջանցքը վերաբացելու համար, քանի դեռ հումանիտար ճգնաժամը չի դարձել աղետալի», - ասվում է Ներկայացուցիչների պալատի անդամ, Կոնգրեսի հայկական խմբի համանախագահ Ֆրենկ Փալոնի գործընկերներին ուղղված՝ բանաձևին աջակցելու կոչով նամակում։
Արցախի և Լաչինի միջանցքի շրջափակման 60-րդ օրը
Դեկտեմբերի 12-ից Արցախի Հանրապետությունը գտնվում է Ադրբեջանի կողմից շրջափակման մեջ. Ստեփանակերտ-Գորիս-Բերձոր (Լաչին) միջպետական միջանցքը, որը Արցախը Հայաստանի հետ կապող միակ ճանապարհն է, ամբողջությամբ փակվել է ադրբեջանցի կեղծ բնապահպանների կողմից։ Արդյունքում խախտվել են երկրի 120 հազար բնակչության, այդ թվում՝ 30 հազար երեխաների իրավունքները։
Այս ընթացքում Ադրբեջանը պարբերաբար խափանում է գազի մատակարարումն Արցախ։ Հունվարի 9-ից չի գործում Արցախը Հայաստանից սնուցող միակ բարձրավոլտ էլեկտրահաղորդման գիծը, ինչի պատճառով էլ Արցախում հունվարի 11-ից հովհարային անջատումներ են սկսվել։ Պարբերաբար խափանվում է հեռահաղորդակցությունն ու ինտերնետ կապը։
Հունվարի 17-ին շրջափակման պատճառով Հայաստանում մնացած 19 արցախցի երեխա վերադարձավ տուն՝ ռուս խաղաղապահների ուղեկցությամբ։
Ներկայումս հանրապետությունում ներդրվել է մի շարք պարենային ապրանքների կտրոնների համակարգ, երկիրն ապրում է ռեսուրսների, վառելիքի, սննդի, դեղորայքի և կենսական նշանակություն ունեցող այլ ապրանքների խնայողության ռեժիմով։
