Հայաստանի ԱԳ նախարար Արարատ Միրզոյանը երկուշաբթի ընդունել է ԵՄ տեխնիկական գնահատման խմբի անդամներին՝ Մարչին Վիդռայի գլխավորությամբ: Խումբը Հայաստան է գործուղվել ԵՄ նոր քաղաքացիական առաքելության տեղակայման հնարավորությունը դիտարկելու համար, հայտնում է ԱԳՆ մամլո ծառայությունը։
Կողմերն անդրադարձ են կատարել դեկտեմբերի 19-ին ավարտված ԵՄ դիտորդական առաքելության աշխատանքներին (Հայաստանի և Ադրբեջանի սահմանին երկամսյա մոնիտորինգի շրջանակում՝ խմբ.): Այս համատեքստում նախարար Միրզոյանը բարձր է գնահատել դիտորդական առաքելության դերը տարածաշրջանում կայունության ամրապնդման ու Հայաստանի նկատմամբ նոր ագրեսիաների կանխարգելման գործում և պատրաստակամություն հայտնել շարունակելու համագործակցությունը։ Քննարկվել են նաև համատեղ հետաքրքրություն ներկայացնող մի շարք հարցեր:
Հանդիպմանը մասնակցել է նաև Հայաստանում ԵՄ պատվիրակության ղեկավար Անդրեա Վիկտորինը:
ԵՄ դիտորդական առաքելությունը հայ-ադրբեջանական սահմանին
2022 թվականի հոկտեմբերի 26-ից դեկտեմբերի 19-ը ԵՄ դիտորդական առաքելությունը դիտարկում է անցկացրել Հայաստանում՝ Ադրբեջանի հետ սահմանային գոտում։ ԵՄ դիտորդական առաքելությունը երկու ամիս շարունակ իրավիճակի դիտարկումներ է իրականացրել հայ-ադրբեջանական սահմանի հայկական կողմում՝ նպաստելու վստահության ձևավորմանը և սահմանային հարցերով հանձնաժողովների աշխատանքին։
