Հայաստանի արտգործնախարարությունը մեկնաբանել է Երևանի և Անկարայի հատուկ ներկայացուցիչների ծրագրված հանդիպման մասին տեղեկատվությունը
ՀՀ ԱԳՆ-ն մեկնաբանել է թուրքական լրատվամիջոցների տարածած տեղեկությունը, թե երկկողմ հարաբերությունների կարգավորման գործընթացի հատուկ ներկայացուցիչներ Ռուբեն Ռուբինյանի և Սերդար Քըլըչի հաջորդ հանդիպումը տեղի կունենա սեպտեմբերին։
«Այս պահի դրությամբ հանդիպման վերաբերյալ որևէ պայմանավորվածություն չկա։ Հայաստան֊-Թուրքիա հարաբերությունների կարգավորման գործընթացի հատուկ ներկայացուցիչների հանդիպումների մասին մենք հանրությանը պատշաճ ժամկետներում, նախօրոք տեղեկացնում ենք»,- «Արմենպրես»-ի հետ զրույցում ասել է ՀՀ ԱԳՆ մամլո խոսնակ Վահան Հունանյանը։
Թուրքական լրատվամիջոցները, վկայակոչելով թուրք բարձրաստիճան դիվանագետին, նաև գրել են, որ հատուկ ներկայացուցիչների հաջորդ հանդիպումը, հնարավոր է, տեղի ունենա Թուրքիայում։
Հայ-թուրքական հանդիպումների մասին
Ավելի վաղ Հայաստանն ու Թուրքիան նշանակել էին հայ-թուրքական հարաբերությունների կարգավորման իրենց հատուկ ներկայացուցիչներին։
Հայ և թուրք հատուկ ներկայացուցիչներ ՀՀ ԱԺ խոսնակ Ռուբեն Ռուբինյանի և փորձառու դիվանագետ, ԱՄՆ թուրքիայի նախկին դեսպան Սերդար Քըլըչի առաջին հանդիպումը կայացել է հունվարի 14-ին Մոսկվայում։ Նրանց երկրորդ հանդիպումն անցել է փետրվարի 24-ին Վիենայում, երրորդը՝ մայիսի 3-ին Վիենայում։
Հուլիսի 1-ին Վիեննայում կայացած չորրորդ հանդիպմանը կողմերը պայմանավորվել են ապահովել Հայաստանի և Թուրքիայի միջև ցամաքային սահմանի հատումը այս երկրներ այցելող երրորդ երկրների քաղաքացիների համար։ Պայմանավորվածություն է ձեռք բերվել նաև հնարավորինս արագ սկսել ուղիղ օդային բեռնափոխադրումներ Հայաստանի և Թուրքիայի միջև և որոշում է կայացվել սկսել այս ուղղությամբ անհրաժեշտ գործընթացները։
Մարտի 12-ին Անթալիայում՝ Անթալիայի դիվանագիտական ֆորումի շրջանակում, տեղի է ունեցել Հայաստանի և Թուրքիայի արտգործնախարարներ Արարատ Միրզոյանի և Մևլութ Չավուշօղլուի հանդիպումը։ Միրզոյանն ավելի ուշ հայտնել է, որ քննարկվել է հարաբերությունների կարգավորման հետագա ընթացքը, կողմերը վերահաստատել են իրենց պատրաստակամությունն առաջ տանել այդ գործընթացն առանց նախապայմանների, որպեսզի այն պսակվի երկու երկրների միջև հարաբերությունների հաստատմամբ և սահմանների բացմամբ։
Հատուկ ներկայացուցիչները վերահաստատել են, որ իրենց նպատակն է այս գործընթացի միջոցով հասնել երկրների միջև լիարժեք կարգավորման։