ԱՄՆ-ն աջակցում է Ադրբեջանի և Հայաստանի միջև կարգավորման բանակցություններին՝ անկախ նրանից, թե որ երկրում են այդ շփումները, երեկ հայտարարել է Պետդեպարտամենտի ներկայացուցիչ Մեթյու Միլլերը։
«Մենք աջակցում ենք այս բանակցություններին՝ լինի դա Վաշինգտոնում, ինչպես անցյալ ամիս, Բրյուսելում, ինչպես մի քանի շաբաթ առաջ, կամ աշխարհի ցանկացած վայրում: Կարևոր է, որ երկու կողմերն էլ շարունակեն խոսել միմյանց հետ», - ասել է Միլլերը ճեպազրույցի ժամանակ՝ պատասխանելով այսօր Մոսկվայում կայանալիք հանդիպման մասին հարցին։
Խոսակը նշել է, որ Վաշինգտոնն աջակցում է երկու կողմերի միջև ուղիղ բանակցություններին: «Մենք կարծում ենք, որ ուղիղ բանակցությունները կարևոր են վերջնական ու տևական կարգավորման հասնելու համար, որը, մեր կարծիքով, հասանելի է», - հայտարարել է Միլլերը:
Նախօրեին Հայաստանի արտգործնախարար Արարատ Միրզոյանը խորհրդարանում նշել էր, որ Հայաստանի և Ադրբեջանի միջև խաղաղության պայմանագրի շուրջ բանակցությունների վերջին երեք փուլերը Վաշինգտոնում (մայիսի 1-4), Բրյուսելում (մայիսի 14) և Մոսկվայում (մայիսի 19) զգուշավոր լավատեսության հիմք են տալիս։
