Թուրքական կողմն իշխանությունների, տեղական ինքնակառավարման մարմինների և բնակչության մակարդակով բավական դրական է արձագանքել երկրաշարժից հետո Հայաստանից փրկարարներ և մարդասիրական օգնություն ուղարկելուն, ասել է Հայաստանի արտգործնախարար Արարատ Միրզոյանը։
«Սա կարևոր մարդասիրական քայլ է մեր կողմից»,- ասել է նա կառավարության նիստում։
Վարչապետ Նիկոլ Փաշինյանն իր հերթին անընդունելի է անվանել Հայաստանի իշխանությունների հասցեին հնչող մեղադրանքները՝ կապված Թուրքիային տրամադրվող մարդասիրական օգնության հետ։
«Ես չեմ պատկերացնում մի իրավիճակ, երբ դռնից այն կողմ միլիոնավոր մարդիկ կան, ովքեր բնական աղետի պատճառով աջակցության կարիք ունեն, և ինչ-որ մեկը կարող է անտարբեր մնալ», - ասել է նա։
Թուրքիայում ավելի քան 35 հազար մարդու կյանք խլած ավերիչ երկրաշարժից հետո Հայաստանը փրկարարական խումբ ու մարդասիրական օգնություն ուղարկեց հարևան երկրին օգնելու համար։
