ԱՄՆ պետքարտուղարությունը կարևորում է Երևանի ու Բաքվի միջև բաց երկխոսությունն՝ առաջընթաց գրանցելու համար՝ ի պատասխան «Ամերիկայի Ձայնի» հայկական ծառայության հարցմանն՝ արձագանքել է ԱՄՆ արտաքին քաղաքական գերատեսչության պաշտոնյան, ով, սակայն, չի ցանկացել հրապարակել իր անունը։
«Ոգևորված ենք շարունակական ներգրավվածությամբ և առաջընթացով, որն առկա է խաղաղության համաձայնագրի շուրջ կողմերի միջև բանակցություններում, այդ թվում այսօր Քիշնևում տեղի ունեցած առաջնորդների հանդիպումը։ Բաց երկխոսությունը կարևոր է առաջընթացի համար՝ ներառյալ հեռանկարների լիարժեք ըմբռնումը: Կշարունակենք խրախուսել երկխոսությունը և աջակցել կողմերին, երբ նրանք աշխատում են երկարատև և արժանապատիվ խաղաղության հասնելու համար»,- ասված է պետքարտուղարության պաշտոնյայի պատասխանում:
Նախօրեին՝ հունիսի 1-ին, Քիշնևում կայացել է հնգակողմ հանդիպում Հայաստանի վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի, Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի և Ադրբեջանի նախագահ Իլհամ Ալիևի միջև։
ՀՀ կառավարության մամուլի ծառայությունից հայտնում են, որ քննարկվել են տարածաշրջանային տրանսպորտային և տնտեսական ենթակառուցվածքների ապաշրջափակմանը, երկու երկրների միջև սահմանազատման և սահմանային անվտանգության ապահովման աշխատանքներին, Հայաստանի և Ադրբեջանի միջև հարաբերությունների կարգավորման համաձայնագրին, Լեռնային Ղարաբաղի ժողովրդի իրավունքների և անվտանգության հասցեագրման անհրաժեշտությանը, ինչպես նաև գերիների, անհետ կորածների և այլ հումանիտար խնդիրներին վերաբերող հարցեր:
Հնգակողմ հանդիպումից հետո Փաշինյանը հանդիպել է Մոլդովայի հայ համայնքի ներկայացուցիչների հետ, որում բարձրացրել է մի շարք արդիական հարցեր։
«Քիշնևում կայացած հանդիպմանը պայմանավորվածություն է ձեռք բերվել, որ հաջորդ եռակողմ հանդիպումը կկայանա Բրյուսելում հուլիսի 21-ին, ուզում եմ տեղեկացնել, որ մինչ այդ՝ հունիսի 12-ին, ԱՄՆ-ում կկայանա Հայաստանի և Ադրբեջանի ԱԳ նախարարների հանդիպումը։ Վաղը (հունիսի 2-ին) Մոսկվայում նախատեսված է տարածաշրջանային հաղորդակցությունների ապաշրջափակման հարցերով եռակողմ աշխատանքային խմբի հանդիպումը»,- նշել է Հայաստանի վարչապետը։
