Բանակցություններ են տարվում Հայաստանի վարչապետ Նիկոլ Փաշինյանի ու Ադրբեջանի նախագահ Իլհամ Ալիևի հանդիպան շուրջ։ Տեղեկությունն ասուլիսում հայտնեց ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանը:
«Վերջին շրջանում բավականին ակտիվ գործունեություն է իրականացվում դիվանագիտական հատվածում, հանդիպումները բավականին հաճախ են ու տարբեր ձևաչափերով: Որքանով տեղյակ եմ՝ կան բանակցություններ, որ որոշ ժամանակ անց պետք է հանդիպում տեղի ունենա երկու երկրների ղեկավարների միջև»,- ասաց նա։
Աղաջանյանը հանդիպման հստակ ժամկետներ չնշեց:
Բրյուսելում կայացած եռակողմ հանդիպման մասին
Դեկտեմբերի 14-ին Բրյուսելում Եվրոպական խորհրդի նախագահ Շառլ Միշելի, Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի եռակողմ հանդիպմանը հաստատվել է երկաթուղու վերագործարկման մասին համաձայնագիրը՝ միջազգայնորեն ընդունված սահմանային և մաքսային նորմերին համաձայն՝ երկրների ինքնիշխանության և իրավասության մեջ փոխադարձության սկզբունքով։
Փաշինյանն ու Ալիևը պայմանավորվել են սահմանին դեէսկալացիայի անհրաժեշտության մասին՝ նախքան սահմանագծման և սահմանազատման բանակցությունների մեկնարկը։ Եվրամիությունը փորձագետների առաքելություն կտրամադրի Հայաստանի և Ադրբեջանի միջև սահմանների սահմանագծման և սահմանազատման հարցերը լուծելու համար։
Հայաստանի և Ադրբեջանի ղեկավարները հաստատել են, որ 2020 թվականի նոյեմբերի 9-ի և 2021 թվականի հունվարի 11-ի երկու եռակողմ հայտարարությունների շրջանակներում ստանձնած առանցքային պարտավորությունները կկատարվեն, և որ 2021 թվականի նոյեմբերի 26-ին Սոչիում ձեռք բերված պայմանավորվածությունները պետք է իրականացվեն։
Շառլ Միշելը կոչ է արել ամբողջական և շուտափույթ լուծում տալ բոլոր հումանիտար խնդիրներին, ինչպիսիք են գերիների ազատ արձակումը և անհայտ կորածների ճակատագիրը, միաժամանակ գիտակցելով, որ երկու կողմերի մարդասիրական ժեստերը նաև նպաստում են վստահության ձևավորմանը և օգնում են բարենպաստ միջավայր ստեղծել խաղաղության և հաշտեցման համար: