Հայաստանի փոխվարչապետ Մհեր Գրիգորյանը պատասխանել է եռակողմ աշխատանքային խմբի գործունեությանը և կապի ապաշրջափակման առաջընթացին վերաբերող հարցերին։
«Փաստորեն, երկաթուղու հետ կապված մենք ամենաբարձր մակարդակով փոխըմբռնում ունենք, և դա հաստատվում է հայտարարություններով։ Ես սա շատ դրական առաջընթաց եմ համարում։ Այս պահին ավելի շատ փորձագիտական աշխատանք է տարվում»,- ասաց Գրիգորյանը։
Նա խոստացավ տեղեկատվություն տրամադրել եռակողմ աշխատանքային խմբի հետագա գործունեության մասին։
«Մեր աշխատանքային խումբն աշխատում է շատ կոնկրետ հարցերի շուրջ և կոնկրետ նպատակներ է հետապնդում՝ երկաթուղու հայկական հատվածների կառուցումն»,- ասաց Գրիգորյանը։
Երկաթուղու մասին
Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը դեկտեմբերի 14-ին Բրյուսելում Եվրոպական խորհրդի ղեկավար Շառլ Միշելի նախաձեռնությամբ կայացած հանդիպմանը հաստատել են Երասխ-Ջուլֆա-Օրդուբադ-Մեղրի-Հորադիզ երկաթուղու կառուցման համաձայնությունը։
Երասխը բնակավայր է Երևանին հարող ՀՀ Արարատի մարզի ծայրամասում, Մեղրին քաղաք է Սյունիքում (Հայաստանի հարավում, սահմանակից է Իրանին և Ադրբեջանին)։ Նշված մնացած բնակավայրերը՝ Ջուլֆա-Օրդուբադ-Հորադիզ, քաղաքներ են Ադրբեջանում։
Փաշինյանի խոսքով, այս երկաթուղին կգործի միջազգայնորեն ընդունված սահմանային և մաքսային նորմերին համապատասխան՝ երկրների ինքնիշխանության և իրավասության մեջ փոխադարձության սկզբունքով։ Նա նշեց, որ Հայաստանն այս երկաթգծով ելք կստանա դեպի Իրան և Ռուսաստան, իսկ Ադրբեջանը՝ երկաթուղային կապ Նախիջևանի հետ (ինքնավար հանրապետություն, ադրբեջանական էքսկլավ):
Հայաստանի էկոնոմիկայի նախարարության տվյալներով՝ Երասխ - Ջուլֆա - Օրդուբադ - Մեղրի - Հորադիզ երկաթուղու կառուցման համար կարող են պահանջել 1,2 մլրդ դոլարի ներդրումներ։