Բավ է պառակտվել
25-05-2021 20:51

Ադրբեջանի ռազմական գործողությունների իրականացումը իրավունք է տալիս ՀՀ-ին ձեռնարկելու համարժեք քայլեր

Հայաստանի արտաքին գործերի նախարարությունը հայտարարություն է տարածել՝ կապված հայ-ադրբեջանական սահմանին տեղի ունեցած փոխհրաձգության հետ, որի արդյունքում հայ զինվոր է զոհվել:

Հայաստանի Գեղարքունիքի մարզի Վերին Շորժայի սահմանային հատվածում մայիսի 25-ին, ժամը 14:20-ի սահմաններում, զենքի օգտագործման դեպք է տեղի ունեցել: Մասնավորապես, հակառակորդը կրակ է բացել հայ դիրքապահների ուղղությամբ: Ավելի ուշ Պաշտպանության նախարարությունը հաղորդել է, որ Վերին Շորժայի հատվածում հակառակորդի կրակոցից հետո սկսված փոխհրաձգության արդյունքում մահացու վիրավորում է ստացել պայմանագրային զինծառայող, կրտսեր սերժանտ Վ. Խուրշուդյանը:

Ներկայացնում ենք հայտարարության ամբողջական տեքստը։

«Մայիսի 25-ին ՀՀ Գեղարքունիքի մարզի Վերին Շորժայի հատվածում Ադրբեջանի զինված կազմավորումների կողմից արձակված կրակահերթերից մահացու հրազենային վիրավորում է ստացել ՀՀ զինծառայող, կրտսեր սերժանտ Գևորգ Խուրշուդյանը:

Խստորեն դատապարտում ենք Ադրբեջանի կողմից ՄԱԿ անդամ պետության՝ Հայաստանի ինքնիշխան տարածքի նկատմամբ իրականացված բացահայտ զինված ոտնձգությունը, ինչը միջազգային իրավունքի նորմերի խախտում է:

Հակառակ միջազգային հանրության կոչերի՝ Ադրբեջանը հրաժարվում է դուրս բերել իր զինված ուժերը Հայաստանի ինքնիշխան տարածքից՝ էլ ավելի սրելով իրադրությունը և խաթարելով տարածաշրջանային անվտանգությունն ու կայունությունը: Ադրբեջանի կողմից Հայաստանի ինքնիշխան տարածքում ռազմական գործողությունների իրականացումը իրավունք է տալիս Հայաստանի Հանրապետությանը ձեռնարկելու անհրաժեշտ և համարժեք քայլեր՝ իր ինքնիշխանությունն ու տարածքային ամբողջականությունը պաշտպանելու, բնակչության անվտանգությունն ապահովելու համար:

Հատկանշական է, որ Ադրբեջանը փորձում է քողարկել Հայաստանի տարածքում իր այս ապօրինի ռազմական գործողությունները կեղծ տեղեկատվության շրջանառմամբ: Հայկական կողմը պատրաստ է ներգրավել միջազգային հետաքննություն՝ տվյալ մահաբեր միջադեպի բոլոր հանգամանքները պարզելու նպատակով»:

Հայաստանում խայտառակ են որակել Ադրբեջանի ռազմական գործողությունները Ղարաբաղում
ՀՀ ԱԳՆ հայտարարությունը ԼՂ հակամարտութան գոտում Ադրբեջանի գործողությունների վերաբերյալ
Ադրբեջանը կարող է հանդիպումներ ունենալ ԵԱՀԿ ՄԽ հովանու ներքո՝ զուգահեռաբար փնտրելով բարենպաստ պահ նոր ռազմական օպերացիայի համար. Եվսեև
Միրզոյանը՝ Իրանի դեսպանին․ Ադրբեջանի սադրիչ գործողությունները Հայաստանի նկատմամբ խաթարում են խաղաղությանն ուղղված ջանքերը
Երևանն ու Բաքուն հաստատել են իրենց մասնակցությունը հոկտեմբերի 9-ին Մոսկվայում կայանալիք խորհրդակցություններին