ՌԴ ԱԳՆ պաշտոնական ներկայացուցիչ Մարիա Զախարովան ճեպազրույցում անդրադարձել է վերջին օրերին շրջանառվող թեմային, թե ճնշումներ են գործադրվում Հայաստանի վրա՝ հարկադրելու նրան միանալ Ռուսաստան-Բելառուս միութենական պետությանը։
«Ո՞ւմ են վկայակոչում մարդիկ, ովքեր խոսում են հարկադրանքի մասին։ Ի՞նչ փաստեր են վկայակոչում։ Կա՞ն ինչ-որ փաստեր, թե ինչպես է տեղի ունեցել հարկադրանքը. բարեկամական իրադրությունո՞ւմ, կարմիր գինու գավաթի շո՞ւրջ, թե՞ կոշտ է տեղի ունեցել այդ հարկադրանքը։Պետք է, չէ՞, հասկանալ, թե ինչպես է դա տեղի ունեցել։ Թե՞ մարդը վեր է կացել եւ ասում է. «Գիտեմ, որ հարկադրել են։ Անգամ հիշում եմ, բայց չեմ հիշում թե ով եւ չեմ հիշում, թե ինչպես։ Պետք է փաստեր լինեն», - ասել է Զախարովան:
Նա նշել է, որ եթե մարդիկ նման հայտարարություններն են անում՝ փաստեր չներկայացնելով, և ընդ որում՝ կոնկրետ նշում են երկիրը և պահանջներ ներկայացնում նրան, ապա դա պետք է փաստերով հիմնավորվի։
Ավելի վաղ ՀՀ Անվտանգության խորհրդի քարտուղար Արմեն Գրիգորյանը հայտարարել էր, որ «Միութենական պետության մասով Հայաստանի վրա մեծ ճնշում կա», սակայն չէր հստակեցրել, թե ում կողմից են այդ ճնշումները։