Հավաքական անվտանգության պայմանագրի կազմակերպության (ՀԱՊԿ) դերը որպես տարածաշրջանում անվտանգության առանցքային կառույց կմեծանա, համաշխարհային անկայունության ֆոնին կաճի նաև կազմակերպության ջանքերի պահանջարկն։ Այս մասին հինգշաբթի օրը կայացած ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Հավաքական անվտանգության պայմանագրի կազմակերպությունն, իրականում, ավելի ու ավելի է ուժեղանում որպես իր պատասխանատվության տակ գտնվող տարածաշրջանում անվտանգության և կայունության ապահովման առանցքային կառույց: Ակնհայտ է, որ շարունակվող գլոբալ անկայունության, տարածաշրջանային հակամարտությունների սրման պայմաններում կմեծանա ՀԱՊԿ-ի ջանքերի դերն ու պահանջարկը»,- ընդգծել է դիվանագետը։
Ինչպես նշել է Զախարովան, Ղազախստանում ճգնաժամային իրադարձությունների ժամանակ կազմակերպությունը ցուցաբերեց արագ, վճռական և խստորեն իրավական շրջանակներում գործելու կարողություն։
«ՀԱՊԿ-ի փորձը չափազանց պահանջված է, այն մանրակրկիտ կվերլուծվի, առաջին հերթին դաշնակիցների՝ կազմակերպության պատասխանատվության գոտում արտաքին ապակառուցողական միջամտության փորձերին համատեղ հակազդելու ջանքերն ուժեղացնելու նպատակով»,- նշել է նա։
Հունվարի 2-ին Ղազախստանի մի շարք բնակավայրերում բողոքի ակցիաներ տեղի ունեցան, որոնք մի քանի օր անց վերաճեցին անկարգությունների։ Դրանք ուղեկցվեցին ոստիկանների և զինվորականների վրա հարձակումներով: Ղազախստանի նախագահ Կասիմ-Ժոմարտ Տոկաևի խնդրանքով երկիր ուղարկվեցին ՀԱՊԿ խաղաղապահներ՝ ռազմավարական օբյեկտները պաշտպանելու համար։ Ըստ իշխանությունների՝ հունվարի 7-ին սահմանադրական կարգն ընդհանուր առմամբ վերականգնվեց հանրապետության բոլոր մարզերում։