Երևանում ընթանում է ակցիա ի պաշտպանություն ԵԱՀԿ Մինսկի խմբի շրջանակներում ղարաբաղյան կարգավորման շուրջ բանակցությունների ձևաչափի վերսկսման, որը կազմակերպել է «Ազգային- ժողովրդավարական բևեռ» շարժման նախաձեռնող խումբը։
Մի խումբ քաղաքացիներ հավաքվել են մայրաքաղաքի կենտրոնում գտնվող Գարեգին Նժդեհի հուշարձանի մոտ ու երթով շարժվել դեպի Հայաստանի արտաքին գործերի նախարարության շենք: Այժմ այնտեղ նախատեսված է ԵԱՀԿ ՄԽ համանախագահների հանդիպում Հայաստանի արտգործնախարար Արա Այվազյանի հետ:
Ազգային-ժողովրդավարական բևեռի նախաձեռնող խմբի անդամ Վարուժան Ավետիսյանը նշեл 1, որ ակցիայի հիմնական նպատակն է մերժել հանձնման ակտը, որը վերաբերում է Հայաստանի տարածքային խնդիրներին, ինչպես նաև ներկայացնել իրենց դիրքորոշումները:
«Մենք Մինսկի խմբից պահանջում ենք, որ արցախյան հիմնախնդրի կարգավորման գործընթացը վերադառնա ՄԽ ձևաչափ, որպեսզի միջազգային խաղաղապահներ տեղակայվեն և հակառակորդի ուժերը դուրս բերվեն տարածքներից: Մենք կփորձենք հանդիպել ԵԱՀԿ Մինսկի խմբի համանախագահների հետ», - ասաց Ավետիսյանը:
Ինչպես նշել է Ավետիսյանը, ակնհայտ է, որ առնվազն երկու երկիր՝ Ֆրանսիան և ԱՄՆ-ն, ջանքեր են գործադրում գործընթացը ԵԱՀԿ Մինսկի խմբի ձևաչափին վերադարձնելու համար, մինչդեռ Ադրբեջանը փորձում է չեղարկել այդ ջանքերը:
«Ուստի անհրաժեշտ է ամեն ջանք գործադրել, որպեսզի թշնամու նպատակները չիրականանան: Եթե հայկական կողմն ավելի ակտիվ լիներ, իրավիճակն ավելի լավ կլիներ, բայց պատերազմ էր, այն իր սեփական կանոններն ունի, և այս պահին անհրաժեշտ է գործընթացը հնարավորինս արդյունավետ և արագ տեղափոխել ԵԱՀԿ ՄԽ հարթակ», - ասաց նա:
Ավետիսյանի խոսքով՝ ԵԱՀԿ Մինսկի խմբի հարթակը գերադասելի է ամեն ինչ թշնամու հայեցողությանը թողնելուց և պարունակում է անվտանգության ու խաղաղության որոշակի երաշխիքներ:
«Ուստի կենսական հիմնախնդիրները լուծելու համար անհրաժեշտ է քննարկումները տեղափոխել ԵԱՀԿ Մինսկի խմբի ձևաչափ, մանավանդ որ Մինսկի խմբի երկու ներկայացուցիչներ խոսեցին նոր առաջարկների մասին, և դրանք քննարկման կարիք ունեն», - ասաց նա:
Իր հերթին, նախաձեռնող խմբի մեկ այլ անդամ` Արա Պապյանը, հայտարարեց, որ Արցախը հայկական է եղել և մնում է, և գործընթացը պետք է վերադառնա իր ձևաչափին:
«Որևէ լուծում չի կարող լինել հիմնված ռուս-թուրքական համաձայնագրերի վրա. 100 տարի առաջվա պատմությունը, երբ Հայաստանը բաժանված էր երկու ուժերի միջև, չի կարող կրկնվել: Հիմա կրկին նման փորձ է արվում, և նման մոտեցումն անընդունելի է նաև ԵԱՀԿ ՄԽ մյուս համանախագահների համար», - ասաց Պապյանը:
Նա շեշտեց, որ նոյեմբերի 9-ին Արցախի վերաբերյալ հայտարարությունը անտեսում է համանախագահների զբաղեցրած հիմնական դիրքորոշումները, բայց առանց արդարության և մեր ժողովրդի իրավունքները հաշվի առնելով, տարածաշրջանում խաղաղություն չի կարող լինել, դա չի կարող լինել մեր անվտանգության հաշվին:
«Հրադադարի մասին հայտարարությունը խորհրդավոր կերպով վերածվել է միջպետական համաձայնագրի և վտանգում է մեր անվտանգության հարցը», - շեշտեց Պապյանը: