Շիրակի մարզի ընդհանուր իրավասության դատարանում այսօր քննվելու էր Արարատ Խանդոյանին պատժի կրումից պայմանական վաղաժամկետ ազատ արձակելու՝ փաստաբան Արա Ղարագյոզյանի միջնորդությունը:
Խանդոյանը զանգվածային անկարգությունների մասնակցելու մեղադրանքով դատապարտվել է 3,5 տարվա ազատազրկման: Արդեն 2 տարի է, ինչ նա անազատության մեջ է, և փաստաբանը առաջին անգամ պատժից վաղաժամկետ ազատ արձակման միջնորդություն է ներկայացրել:
Դատական նիստը, հետաձգվեց դատախազի բացակայության պատճառով: Նա գրություն էր ուղարկել դատարան, թե ծանրաբեռնված է և խնդրում է նիստը հետաձգել:
Այս հանգամանքը որակվեց դիտավորություն, Արարատ Խանդոյանը, չսպասելով դատավորի որոշմանը, վրդովվեց ու լքեց նիստերի դահլիճը:
Ըստ պաշտպանի՝ Խանդոյանը առողջական խնդիրներ ունի, և այսօր վերջինս ձեռնափայտով էր դատարան եկել:
Ղարագյոզյանը պնդում է, թե իր պաշտպանյալի նկատմամբ նախկին իշխանությունները քաղաքական հետապնդում են իրականացրել, և օր առաջ նա պետք է հայտնվի ազատության մեջ:
Դատական հաջորդ նիստը նշանակվեց հուլիսի 12-ին: