Հայաստանի իշխանությունները պետք է հնարավորինս արագ կահավորեն և պատշաճ կերպով սարքավորեն Ադրբեջանի հետ պետական սահմանագիծը, երեքշաբթի մամուլի ասուլիսում ասաց ռազմական փորձագետ, հետախուզադիվերսիոն առաջին ջոկատի հրամանատար Վովա Վարդանովը:
Հաշվի առնելով Սյունիքում և Գեղարքունիքում տեղի ունեցած վերջին իրադարձությունները՝ ադրբեջանական ներխուժումը, Վարդանովը շեշտեց, որ անհրաժեշտ է օգնել հայկական բանակին, չնայած այն բանին, որ ՀՀ ՊՆ և ՀՀ ԶՈւ գլխավոր շտաբի հասցեին հնչող քննադատությունները արդարացի են։
«Արցախում կապիտուլյացիայից հետո պետությունը ուշքի չեկավ: Գլխավոր շտաբն ի զորու չէ ժամանակին համարժեք պատասխան տալ հակառակորդի գործողություններին: Մենք նրանց ճիշտ ենք քննադատում, բայց հիմա դրա ժամանակը չէ: Մենք չենք ցանկանում Պաշտպանության նախարարության և Գլխավոր շտաբի փլուզում, նրանք աջակցության և օգնության կարիքն ունեն», - ասաց նա:
Նրա կարծիքով, Հայաստանի և Ադրբեջանի սահմանային գծում ռազմական տեխնիկա տեղակայելու խնդիր կա, տեխնիկան քիչ է, քանի որ ավելի վաղ այս տարածքներում ռազմական գործողություններ չեն եղել:
Բացի այդ, որոշակի դժվարություններ առաջանում են եղանակային պայմանների պատճառով:
«Մեր բանակը հարմարեցված չէ ձյան միջով առաջ շարժվելու համար, մեր զինվորներին չեն վարժում դահուկով տեղաշարժվել, իսկ ադրբեջանցիները պատրաստ էին: Նրանք արդեն մոտ էին, և հենց որ ձյունը մի փոքր հալվեց, նրանք այլևս չհապաղեցին», - բացատրեց Վարդանովը:
Նա հավելեց, որ իր հիմնադրած և ղեկավարվող VOMA ռազմահայրենասիրական կազմակերպությունը զբաղվում է նաև ձյունածածկ տարածքներում գործողություններ իրականացնելու վարժանքներով: