Հայաստանի պաշտպանության նախարարությունը տեղեկացրեօլ է, որ նախօրեին ամփոփվել են “Խաղաղության մարտիկ” մրցույթի եզրափակիչ` “Բուժօգնության կազմակերպում” մրցափուլի արդյունքները:
Մասնակիցներն իրականացրել են պայմանական վիրավորների տարհանում մարտադաշտից և ցուցաբերել առաջին բուժօգնություն: Մրցափուլում հաղթող է ճանաչվել ՀՀ զինված ուժերի հավաքական թիմը:
"Պրոֆեսիոնալ” մրցաձևի բոլոր երեք մրցափուլերի արդյունքներով “Խաղաղության մարտիկ” մրցույթի առաջատարը ՀՀ զինված ուժերի թիմն է: Երկրորդ տեղում է Ռուսաստանի Դաշնության, երրորդ տեղում՝ Ղազախստանի թիմը:
Բանակային միջազգային խաղերի բարեկամ բանակների զինծառայողների ռազմապրոֆեսիոնալ վարպետության “Խաղաղության մարտիկ” միջազգային մրցույթն անց է կացվում 2009 թվկանից՝ Ռուսաստանի պաշտպանության նախարարության և ԱՊՀ անդամ պետությունների պաշտպանության նախարարությունների համագործակցության պլանների համաձայն: Այս տարի այն անցկացվում է Հայաստանում, և մեկնարկել է օգոստոսի 3-ին: