Հայաստանը կավելացնի կանանց անվճար բժշկական ստուգումների քանակը, հինգշաբթի կառավարության նիստի ժամանակ ասաց Հայաստանի առողջապահության նախարար Արսեն Թորոսյանը:
Հայաստանի կառավարությունը հինգշաբթի օրը կայացած նիստում հաստատեց առողջության գործոնով պայմանավորված ծնելիության մակարդակի բարձրացման ծրագիրը:
«Ծրագիրն ուղղված է ժողովրդագրական բարեփոխումների իրականացմանը և ծնելիության խթանմանը, իսկ դրա համար միջոցներն արդեն նախատեսված են բյուջեով», - ասաց Թորոսյանը:
Նախարարի խոսքով՝ ծրագիրն ունի երեք հիմնական կետ, որոնցից առաջինը վերաբերում է 15 տարեկանը լրացած աղջիկներին:
Նա նշեց, որ նրանց համար ծրագիրով նախատեսվում են լրացուցիչ ստուգումներ պոլիկլինիկաներում առողջական խնդիրների վաղ հայտնաբերման համար՝ անպտղությունից խուսափելու նպատակով:
«Երկրորդ կետը զույգերի հետազոտությունն է ամուսնությունը գրանցելուց հետո՝ երեխայի ծնունդը պլանավորելիս հնարավոր խանգարումներն ու խնդիրները հայտնաբերելու համար», - ասաց Թորոսյանը:
Երրորդ կետով նա նշել է հղիության ընթացքում հետազոտությունների զգալի ընդլայնումը, ինչը կհանգեցնի ինքնաբեր վիժումների թվի նվազմանը:
Նա նշեց, որ ծրագրում կընդգրկվի ավելի քան 10 հազար կին, իսկ արդյունքները երկարաժամկետ կլինեն. եթե 2020-ին դրա շնորհիվ մի քանի ավել երեխա կծնվի, ապա արդեն 2021-2022 թվականներին՝ մի քանի հազար:
Նախարարը նաև մատնանշեց ԱՄԲ (ЭКО՝ խմբ․) աջակցության ծրագրին դիմողների մեծ քանակը, նշելով, որ ծրագրով կատարված 92 միջամտությունից 42-ում գրանցվել է հղիություն, ինչը շատ բարձր տոկոս է:
«Մենք նախատեսում ենք շուտով փոփոխություններ կատարել և ընդլայնեյ այն մարդկանց շրջանակն, ում հասանելի կլինի այս ծառայությունն», - ասաց Թորոսյանը: