Սիրիայում երկրաշարժի գոտում աշխատող հայ փրկարարների թիմը շնորհակալագրեր է ստացել Հալեպի նահանգապետարանից։
Հալեպում Հայաստանի գլխավոր հյուպատոսությունից հայտնում են, որ Հալեպի նահանգապետ Հուսեյն Դիյաբը շնորհակալագրերը հանձնել է Հայաստանի Գլխավոր Հյուպատոսության խորհրդական, հյուպատոս Բաբկեն Բադալյանի, Հալեպ ժամանած միջազգային փրկարարական խմբի ղեկավար գնդապետ Արմեն Գևորգյանի և որոնողափրկարարական ջոկատի հրամանատար գնդապետ Սերգեյ Բիձյանի հետ հանդիպմանը։
Արմեն Գևորգյանը ներկայացրել է անցնող օրերին կատարված աշխատանքների վերաբերյալ ամփոփ տեղեկատվություն և շնորհակալություն հայտնել Հալեպի նահանգապետարանի կողմից ցուցաբերված աջակցության համար։
Հայաստանը 29 փրկարար է ուղարկել Սիրիայի երկրաշարժից տուժած շրջաններ։