Հայկական դիրքերի ուղղությամբ հարձակում նախաձեռնած ադրբեջանական ստորաբաժանումները ետ են շպրտվել իրենց ելման դիրքեր, հաղորդում է Հայաստանի պաշտպանության նախարարության մամուլի ծառայությունը:
«Հայկական դիրքերի ուղղությամբ հարձակում նախաձեռնած ադրբեջանական ստորաբաժանումները, ժամը 09։20-ի դրությամբ, տալով կորուստներ, ետ են շպրտվել իրենց ելման դիրքեր»,- ասվում է հաղորդագրության մեջ:
Հայ-ադրբեջանական սահմանի մնացած բոլոր հատվածներում իրավիճակը կայուն է և գտնվում է Հայաստանի զինված ուժերի լիակատար վերահսկողության ներքո:
Առավոտյան ժամը 4-ի սահմաններում Ադրբեջանի զինված ուժերը գրոհել են հայկական դիրքերը սահմանի հյուսիսարևելյան ուղղությամբ (Սոթք - Վերին Շորժա): Ժամը 08: 30-ի դրությամբ հայկական կողմն ունի երեք զոհ և երկու վիրավոր: Մինչ այժմ Բաքուն հայտնել է ընդամենը երկու վիրավորի մասին: Մարտական գործողությունները շարունակվում են:
Հայաստանի և Ադրբեջանի սահմանին իրավիճակը սրվեց մայիսի 12-ին: Ադրբեջանցի զինվորականները գտնվում են Հայաստանի Սյունիքի մարզի Սև լճի տարածքում՝ փորձելով ամրապնդել դիրքերը հայկական տարածքների հաշվին: Նմանատիպ իրավիճակ է Գեղարքունիքի մարզում՝ Վարդենիսի մերձակայքում: Պարբերաբար միջադեպեր են տեղի ունենում պետական սահմանի տարբեր հատվածներում: Մայիսի 25 -ին տեղի ունեցած փոխհրաձգության արդյունքում զոհվել է Հայաստանի զինված ուժերի պայմանագրային զինծառայող:
Հուլիսի 14-ի գիշերը հակառակորդն արդեն կրակ էր վարում Երասխի ուղղությամբ՝ փորձելով դիքային առաջխաղացում իրականացնել։ Հայաստանի զինված ուժերը ձախողել են այս փորձերը, բայց փոխհրաձգության արդյունքում հայ զինվոր է զոհվել: