Հայաստանի ավտոսիրողները պատրաստվում են ավտոերթ կազմակերպել՝ ի նշան ճանապարհային երթևեկության կանոնների խախտման համար նախատեսված բալային համակարգի դեմ բողոքի։
Լրատվամիջոցները նշում են, որ կառավարության նոր նախաձեռնությունը շարունակում է հանրային դժգոհություն հարուցել։
Պարբերականի տվյալներով՝ ավտոսիրողների մի քանի խումբ դիտարկում է Հանրապետության հրապարակում ավտոերթի անցկացման հնարավորությունը։
“Այսպիսով ավտոսիրողները ցանկանում են իրենց դժգոհությունն արտահայտել ընդդեմ ճանապարհային երթևեկության կանոնները խախտելու համար նախատեսված բալային համակարգի՝ առաջարկելով, որ կառավարությունը հրաժարվի այդ փոփոխությունների իրագործման գաղափարից”,- ասվում է հոդվածում։
Չնայած կառավարության հիմնավորումներին, որ համակարգի նպատակը ճանապարհատրանսպորտային պատահարների թվի նվազեցումն է, լրատվամիջոցը նշում է, որ փորձագետների կարծիքով՝ պատահարների քանակի նման աննախադեպ աճը պայմանավորված է մեքենաների թվի ավելացմամբ և նոր պահանջներին Հայաստանի ճանապարհային ենթակառուցվածքների անհամապատասխանելիությամբ։