Երևանի նոր քաղաքապետ Հայկ Մարությանը, նախքան հոկտեմբերի 13-ին կայանալիք երդմնակալությանն, արդեն անցել է քաղաքապետի պարտականությունների կատարմանը․այդ մասին գրել է “Հրապարակ” օրաթերթը։
“Առաջին գործերից մեկը եղել է Երևանի 2800-ամյակի տոնակատարության ծրագրի ուսումնասիրությունն ու ծախսերի զգալի կրճատումը”,- նշվում է հրապարակման մեջ։
Օրաթերթի տեղեկություններով, տոնակատարության համար նախատեսված է եղել 1,7 մլրդ․ դրամ, իսկ Մարությանը՝ չեղարկելով միջոցառումների մեծ մասը՝ ծախսերը կրճատել է մինչև 300 մլն․դրամ։
“Նա ցանկանում էր ավելի շատ կրճատել, սակայն միջոցների մի մասն արդեն ծախսված է, իսկ պայմանագրերը՝ կնքված”,- ասվում է նյութում։
Էրեբունի-Երևանի 2800-ամյակին նվիրված տոնակատարությունը տեղի կունենա հոկտեմբերի 20-21-ը:
Էրեբունին (Երևանը) հիմնադրվել է մ.թ.ա 782 թ. Հայկական լեռնաշխարհի հարավ-արևելքում՝ Արգիշտի թագավորի կողմից: Սեպագիր քարը, որի վրա փորագրված է Երևանի հիմնադրման տարեթիվը, գոյություն ունի մինչ այժմ և գտնվում է Էրեբունի բերդ-թանգարանում:
Երևանը հռչակվել է Հայաստանի առաջին հանրապետության մայրաքաղաք 1918թ․ մայիսի 28-ին։ Երևանի օրը նշվում է 1968թ․ի վեր՝ ամեն տարի։