ՀՀ երկրորդ նախագահի որդի Լևոն Քոչարյանի համար կանխատեսելի էր դատարանի որոշումը։ Վերջինս լրագրողների հետ զրույցում նշեց,որ այս դատավորից ոչ մի ակնկալիք պետք չէ ունենալ արդարադատության իրականացման հարցում: «Ոչ մի վայրկյան չեմ զարմանում նրա հերթական ապօրինի որշման վրա», - ասաց Լևոն Քոչարյանը:
Հիշեցնենք, որ այսօր դատարանը մերժեց Քոչարյանի պաշտպանների միջնորդությունը՝ կալանքը գրավով փոխելու մասին:
Անդրադառնալով մարզերում ի աջակցություն Քոչարյանի անցկացվող ստորագրահավաքին՝ նա ասաց, որ բավականին աշխույժ ու լավ է անցնում այդ ստորագրահավաքը:
Դիտարկմանը, որ մամուլը հակառակն է գրում, Լևոն Քոչարյանն ասաց. «Մամուլում ինչ ասես չի գրվում. մեր ընտանիքի հետ կապված ինչ հիմարություն, ինչ ստոր սուտ ասես գրվել է: Մամուլում գրվածը համարել վերին ատյանի ճշմարտություն, իհարկե, սխալ է: Անցած անգամ, երբ մենք զրուցում էինք, ես հարց տվեցի, թե ով է պատասխան տալու մեր ընտանիքի հանդեպ տարածվող ստի ու կեղծիքի համար, ինչ-որ մեկը պե՞տք է լինի, թե՞ ոչ»:
Լևոն Քոչարյանը նշեց, որ մինչև հիմա մարդիկ ինչ հիմարության ասես հավատում են: Այն հարցին, թե ինչո՞ւ ժամանակին չէին արձագանքում դրան, նա ասաց, որ չեն արձագանքել, որովհետև չեն մտածել, որ նման սուտն ու կեղծիքը կարող է մտնել մարդկանց մեջ, հիմա տեսնում են, որ այդ ամենն արմատացել են ու կեղծիքն արել է իր գործը:
Լրագրողները նաև պաշտպան Ռուբեն Սահակյանից հետաքրքրվեցին պատրաստվո՞ւմ են բողոքարկել դատարանի որոշումը և ի՞նչ հիմքով կարող էր մերժվել պաշտպանական կողմի միջնորդությունը, Սահակյանը նշեց,որ հավանաբար, հաշվի է առնվել մեղադրական կողմի փաստարկը, թե Քոչարյանը կարող է խոչընդոտել գործի քննությանը:
«Ես վստահ եմ, որ դատավոր Դանիբեկյանը չի կարդացել միջնորդությունը, այն տողերը, որ ես գրավոր ներկայացրի նախորդ դատական նիստին, բաղկացած էր 5 էջից: Բացի դա Էստեղ չկա մեղադրանք, Գյուլնազ տատի հեքիաթի հետ չեմ կարող համեմատել, սա կարող եմ համեմատել գեներալ-լեյտենանտ Արթուր Դավթյանի գրած հեքիաթի հետ»,- ասաց նա:
Անդրադառնալով Վերաքննիչ դատարանից սպասելիքներին,ասաց, որ ամեն ինչ կախված է դատավորից, եթե գործն ընկնի դատավոր Ազարյանի մոտ, միանշանակ, կբավարարի իրենց հայցը:
Ի դեպ Ռոբերտ Քոչարյանի ավագ որդին՝ Սեդրակ Քոչարյանը, չի կարողանում այցելել հորը:
Հարցին՝ ի՞նչ հիմքով է տեսակցությունն արգելվել՝ Սահակյանը պատասխանեց.
«Դե հարցրեք իրենց էլի»,–ասաց փաստաբանը։
Արմինե Գևորգյան