Ռուսաստանի Անվտանգության խորհրդի (ԱԽ) փոխնախագահ Դմիտրի Մեդվեդևը հայտարարել է, որ անհրաժեշտ է համարում նոր միջոցներ կիրառել Ռուսաստան ներգաղթյալների հոսքն ավելի մանրակրկիտ վերահսկելու համար։
«Որպեսզի ավելի հեշտ լինի ստանալ բոլոր անհրաժեշտ տեղեկությունները յուրաքանչյուր օտարերկրացու մասին, ով հատել է սահմանը, պատրաստվում է ապրել և աշխատել մեր երկրում»,- ասել է նա Անվտանգության խորհրդի պետական միգրացիոն քաղաքականության բարելավման միջգերատեսչական հանձնաժողովի նիստի ժամանակ, հայտնում է ՏԱՍՍ-ը։
Մեդվեդևի խոսքով՝ համապատասխան գերատեսչությունները ներկայումս դժվարություններ ունեն Ռուսաստանում միգրանտների վերաբերյալ հավաստի և ամբողջական վիճակագրության հարցում։
Անվտանգության խորհրդի փոխնախագահն ընդգծել է միգրանտների գործունեության, նրանց կենսագրական և այլ անձնական տվյալների անհրաժեշտությունը, քանի որ այդ տեղեկատվությունը «կարևոր է երկրի ազգային անվտանգության ապահովման համար, հատկապես՝ ներկա իրավիճակում»։
«Մենք պետք է հստակ հասկանանք, թե ով է մեզ մոտ գալիս և ինչ նպատակներով»,- ասել է Մեդվեդևը։
Ավելի վաղ Մեդվեդևը կոչ էր արել ավելի մեծ վերահսկողություն սահմանել միգրանտների էթնիկ անկլավների շուրջ իրավիճակի նկատմամբ, որոնք դառնում են «հանցագործության օջախներ» և չեն ենթարկվում ռուսական օրենքներին։ Նա նաև մատնանշել էր կանխարգելիչ աշխատանքների անհրաժեշտությունը, այդ թվում՝ սփյուռքի ղեկավարների հետ։