Նախորդ գիշեր Երևանում հաշված րոպեների ընթացքում երկու ՃՏՊ է տեղի ունեցել․ մի դեպքում հղի կին է մահացել, երկրորդում՝ տարեց քաղաքացի։
ՀՀ քննչական կոմիտեից հայտնում են, որ հարուցվել են քրեական գործեր՝ ճանապարհային երթևեկության անվտանգության կանոնները չպահպանելու հատկանիշներով, որն անզգուշությամբ առաջացրել է մարդու մահ (ՀՀ քրեական օրենսգրքի 342 հոդվածի 2-րդ մաս):
Մաշտոցի պողոտայում Երևան քաղաքի 28-ամյա բնակչի կողմից վարած Porshe մակնիշի ավտոմեքենան վրաերթի է ենթարկել 3 հետիոտնի․ Շիրակի մարզի Արթիկ համայնքի բնակիչներ` հարազատներ 38-ամյա և 59-ամյա երկու կանանց և 4-ամյա մի երեխայի։ 38-ամյա հղի կինը մահացել է, նրա 4-ամյա երեխան վերակենդանացման բաժանմունքում է։ Երրորդ տուժածը՝ 59-ամյա տատիկը, նույնպես հոսպիտալացվել է։ Երկուսի վիճակը գնահատվում է ծանր։
Գրեթե նույն պահին մեկ այլ վրաերթ է տեղի ունեցել Երևան քաղաքի Սաֆարյան փողոցի թիվ 2/3 հասցեի դիմացի հատվածում։ Կոտայքի մարզի բնակչի կողմից վարած աղբահանության «ԿամԱԶ» մակնիշի բեռնատար ավտոմեքենան վրաերթի է ենթարկել անձը չպարզված մոտ 60 տարեկան հետիոտն կնոջ, ով ստացած մարմնական վնասվածքներից տեղում մահացել է:
Երկու դեպքի առիթով Նշանակվել են դիակների դատաբժշկական և դատաբժշկական փորձաքննություններ։ Քննությամբ պարզվում են դեպքերի հանգամանքները՝ նաև երթևեկության մասնակիցների գործողություններին իրավական գնահատական տալու նպատակով։
