Հայաստանի Սյունիքի մարզի մարզպետարանը հայտնել է երկու ռուս զինծառայողին բուժօգնություն ցուցաբերելու մասին։
«Մարտի 21-ի երեկոյան Սյունիքի մարզպետարանի ենթակայության Գորիսի բժշկական կենտրոն է դիմել ազգությամբ ռուս երկու զինծառայող՝ գլխի շրջանում թեթև մարմնական վնասվածքներով (ոչ հրազենային)։ Նրանք տեղում ստացել են առաջին բուժօգնություն ու անմիջապես դուրս գրվել հիվանդանոցից», - ասված է գերատեսչության ՖԲ էջում տեղադրված հաղորդագրության մեջ։
Երեկ երեկոյան ՀՀ ՊՆ-ից տեղեկություն է ստացվել, որ հայկական զինված ուժերի զինծառայողը, նախնական տվյալներով, մարտական կետ սնունդ հասցնելիս մոլորվել է մառախուղի մեջ և հայտնվել ադրբեջանական կողմի վերահսկողության տակ գտնվող տարածքում։
Նույն օրը երեկոյան, որոշ ժամանակ անց, հայկական հեռագրային մի շարք ալիքներ և լրատվամիջոցներ չհաստատված տեղեկատվություն տարածեցին, որ ռուս զինծառայողները գնացել են բանակցելու Ադրբեջանի ԶՈւ-ի հետ, սակայն ադրբեջանական կողմի գնդակոծության հետևանքով հրազենային վնասվածքներ են ստացել գլխի շրջանում։ Տեղեկություններ կային նաև, որ հայ բժիշկները պայքարում են նրանց կյանքի համար, նրանցից մեկը մահացել է։
Հայաստանի պաշտպանության նախարարությունը մարտի 22-ին հայտնել է, որ տեղանքում մոլորված ՀՀ զինված ուժերի զինծառայողը որոնողափրկարարական աշխատանքների արդյունքում հայտնաբերվել է, նրա կյանքին վտանգ չի սպառնում։