Հայ բնապահպանները կոչ են անում քաղաքական կուսակցություններին՝ իրենց նախընտրական ծրագրերում տեղ հատկացնել նաև բնապահպանական խնդիրներին, քանի որ տվյալ ոլորտին պատշաճ ուշադրություն չի դարձվում:
Ինչպես երկուշաբթի օրը կայացած ասուլիսին հայտարարել է « Հանուն կայուն մարդկային զարգացման» ասոցիացիայի նախագահ, բնապահպան Կարինե Դանիելյանը՝ քաղաքական կուսակցություններն իրենց նախընտրական ծրագրերում ոչ մի խոսքով չեն անդրադառնում բնապահպանական խնդիրներին:
«ՄԱԿ-ի հետազոտությունների համաձայն բնապահպանական խնդիրները բացակայում են մեր ռազմավարական ծրագրերում: Դա մեզ ստիպեց հանդես գալ քաղաքական կուսակցություններին ուղղված հայտարարությամբ, որովհետև մենք մեծ քայլերով գնում ենք դեպի էկոլոգիական ճգնաժամ»,- ընդգծել է նա:
Դանիելյանի խոսքերով դիմումում նշված են էկոլոգիայի ոլորտում առկա այն հիմնական խնդիրները, որոնք խոչնդոտում են Հայաստանի զարգացմանը:
«Ամենամեծ մտահոգությունը երկրում հանքաարդյունաբերության էքստենսիվ, զարգացումն է, ինչի արդյունքում մենք այն զրկում ենք բնական ռեսուրսներից, մեծ վնաս ենք հասցնում շրջակա միջավայրին, կենսաբազմազանությանը, մարդկանց առողջությանը, գյուղատնտեսության և տուրիզմի զարգացմանը»,- ընդգծել է փորձագետը:
Դանիելյանը վստահ է, որ այդ բոլոր խնդիրների պատճառը էկոլոգիական կուլտուրայի և էկոլոգիական մտածողության ի սպառ բացակայությունն է՝ ինչպես երեխաների, այնպես էլ բարձրաստիճան պաշտոնյաների շրջանում: Ամենուր գերիշխում է միայն ֆինանսական շահույթը:« Մենք պետք է հսկայական քայլեր ձեռնարկենք էկոլոգիական կուլտուրայի ձևավորման հարցում»,- ասել է նա:
Հայկական բուսաբանական ընկերության նախագահի տեղակալ Գոհար Օգանեզովան իր հերթին նշել է, որ հարկավոր է ուշադրություն դարձնել նաև այնպիսի հարցերի, ինչպիսիք են էկոբազմազանությունը, ջրային ռեսուրսների վատ վիճակը և քաղաքաշինության հետ կապված խնդիրները: Այդ ամենը, նրա խոսքերով, հանգեցրել է էկոլոգիական և սեյսմիկ ռիսկերի բարձրացման: