Անոմալ շոգը կարող է վատ ինքնազգացողության պատճառ դառնալ, հատկապես տարեցների, երեխաների, քրոնիկ հիվանդություններ ունեցող մարդկանց համար: Բացի այդ, գրգռիչ և առողջության վատթարացման գործոն կարող է հանդիսանալ ծխելը, ասել է ուրբաթ Թերապիայի և կանխարգելիչ բժշկության ազգային բժշկական հետազոտությունների կենտրոնի տնօրեն, Ռուսաստանի Դաշնության Առողջապահության նախարարության թերապիայի և ընդհանուր բժշկական պրակտիկայի գծով գլխավոր անկախ մասնագետ Օկսանա Դրապկինան։ Այս մասին հայտնում է ՏԱՍՍ-ը:
«Շոգ եղանակին կարող է խաթարվել օրգանների արյան մատակարարումը, տեղի է ունենում էլեկտրոլիտների կորուստ, երակները լայնանում են, անոթազարկն արագանում է: Սա կարող է հանգեցնել թրոմբոզի, իշեմիայի, սրտի անբավարարության և քրոնիկ երակային անբավարարության», - նրա խոսքերն է մեջբերում թերապիայի ԱԲՀԿ մամուլի ծառայությունը։
Նրա խոսքով՝ ծխելը բացասաբար է ազդում օրգանիզմի բոլոր համակարգերի, բայց առաջին հերթին՝ սրտանոթային և նյարդային համակարգի վրա: Պարադոքսալ է, բայց ծխելն է, որ մեծացնում է դյուրագրգռությունն ու ընդհանուր թուլությունը շոգ ժամանակ: Ծխելը և շոգը միասին հանգեցնում են աշխատունակության նվազման և բացասաբար են ազդում ճանաչողական գործառույթների վրա, հետևաբար, շոգի ընթացքում ծխողները հատկապես հաճախ են իրենց վատ զգում, իսկ սրտային հիվանդությունների զարգացման ռիսկը բազմակի աճում է:
«Շոգի անբարենպաստ ազդեցության առաջին նշաններ կարող են լինել դյուրագրգռությունը, գլխացավը և աշխատունակության նվազումը: Ծանր դեպքերում խանգարվում է ջերմակարգավորումը, ի հայտ է գալիս հևոց, մարդը կարող է կորցնել գիտակցությունը», - հավելել է Դրապկինան:
Ըստ նրա՝ այս ախտանիշները հաճախ վկայում են ջերմային կամ արևային հարվածի մասին, ինչը կարող է վնասել ուղեղը:
«Այժմ խստացվում են COVID-19- ի դեմ սանիտարական միջոցառումները, մտցվում են ռեստորաններ և վերանդաներ այցելելու նոր կանոններ: Ես կառաջարկեի դադարեցնել նարգիլե ծխելը ռեստորաններում առնվազն համաճարակի ընթացքում», - հավելել է բժիշկը:
Ինչպես խուսափել գերտաքացումից
Դրապկինան գերտաքացումից խուսափելու համար խորհուրդ է տալիս չմոռանալ շատ ջուր խմել, հրաժարվել ալկոհոլային և քաղցր ըմպելիքներից, լիմոնադներից: Ավելի լավ է օրվա ընթացքում ուտել մի քանի անգամ փոքր չափաբաժիններով, խուսափել ծանր ճարպային կերակուրներից և շատակերությունից: Եթե աշխատանքը դրսում է՝ պետք է փորձել ժամանակ առ ժամանակ լինել սառը, օդորակվող սենյակում: Ցանկալի է, որ դրսի և սենյակի ջերմաստիճանների տարբերությունը չգերազանցի 10 աստիճանը:
«Ջերմաստիճանի կտրուկ փոփոխությունը նույնպես վնասակար է օրգանիզմի համար, կարող է հանգեցնել հիպոթերմիայի և մրսածության», - բացատրեց նա:
«Կրեք բնական բամբակից կամ վուշից թեթև հագուստ, խուսափեք սինթետիկ գործվածքներից և մուգ երանգներից, որոնք կլանում են արևի ճառագայթները և ավելի շատ են տաքանում: Շոգի ժամանակ գործատուներին խորհուրդ ենք տալիս սահմանել աշխատանքային ավելի մեղմ ռեժիմ, թույլ տալ աշխատակիցներին աշխատավայրում փողկապ չկրել», - նշել է նա։
Բացի այդ, պետք չէ մոռանալ գլխարկների և արևային ակնոցների մասին, սա հատկապես վերաբերում է այն երեխաներին, ովքեր առավել ենթակա են ջերմակարգավորման խանգարումներին:
Խոսելով ֆիզիկական ծանրաբեռնվածության մասին՝ Դրապկինան խորհուրդ է տվել շոգ ժամանակ հրաժարվել ծանր ուժային և կարդիո վարժություններից: Կարելի է մարզվել առավոտյան, զբաղվել յոգայով և ձգող վարժություններով, ինչպես նաև լուսադեմին կամ երեկոյան ուշ թեթև հանգստացնող վազքով:
Անոմալ շոգ Հայաստանում
Պայմանավորված արաբական անապատներից արևադարձային տաք օդային հոսանքների ներթափանցմամբ հունիսի 25-28-ը հանրապետության ողջ տարածքում սպասվում է խիստ բարձր ջերմային ֆոն, Արարատյան դաշտում և նրա նախալեռներում, Վայոց Ձորի նախալեռներում, Սյունիքի հովտային գոտում և Երևանում ցերեկային ժամերին սպասվում է +39…+41 աստիճան։ Հունիսի 25-30-ը նշված գոտիներում սպասվում է նաև բարձր կարգի հրդեհավտանգ իրավիճակ: Ուլտրամանուշակագույն ճառագայթման ինտենսիվությունը սպասվում է նորմայից բարձր։ Խորհուրդ է տրվում ժամը 11։00-ից մինչև 17։00-ն ընկած ժամանակահատվածում խուսափել արևի ուղիղ ճառագայթներից։