Հայաստանի արտգործնախարար Արարատ Միրզոյանը երեքշաբթի հանդիպել է Ադրբեջանում ապօրինաբար պահվող հայ ռազմագերիների ծնողների և հարազատների խմբի հետ։ Այս մասին հայտնում են Հայաստանի ԱԳՆ մամլո ծառայությունից։
Միրզոյանն անդրադարձել է ռազմագերիների և այլ պահվող անձանց ազատ արձակման խնդրի՝ միջազգային բարձրաստիճան պաշտոնյաներին, խորհրդարանականներին, մարդու իրավունքների պաշտպանությամբ զբաղվող կազմակերպություններին ներկայացնելու ուղղությամբ տարվող աշխատանքներին, ապա պատասխանել ներկաների հարցերին:
Միրզոյանը վերահաստատել է, որ Հայաստանի ԱԳՆ-ն գործադրում է բոլոր ջանքերն՝ Ադրբեջանի կողմից ռազմագերիների շուտափույթ ազատ արձակման և նրանց հայրենադարձման ուղղությամբ:
Հայաստանի վարչապետ Նիկոլ Փաշինյանը ավելի վաղ հայտարարել էր, որ մինչ օրս Ադրբեջանում պահվում է 39 հայ գերի։ Իրավապաշտպանները հայտնում են մոտ 150 գերու մասին։