2022 թվականի սեպտեմբերին Իրանի Իսլամական Հանրապետության քաղաքացին արտասահմանյան երկրներ արտահանելու նպատակով ապօրինի ձեռք է բերել և պահել Հայաստանում մոտ 10 կգ մետամֆետամին տեսակի թմրամիջոց։
Գլխավոր դատախազության մամուլի ծառայությունից հայտնում են, որ նախաքննությամբ պարզվել է, որ նա շուրջ 3 կգ «մեթամֆետամին» տեսակի թմրամիջոցը փոստային առաքում իրականացնող ընկերության միջոցով՝ մաքսանենգությամբ, առաքել է Ավստրիայի Հանրապետություն, մոտ նույնքան էլ փորձել է առաքել Ավստրալիա։ Թմրամիջոցը հայտնաբերվել է ՊԵԿ Մաքսանենգության դեմ պայքարի վարչության կողմից, իսկ Իրանի քաղաքացու ժամանակավոր բնակության վայրում՝ հյուրանոցում հայտնաբերվել է նաև 3 հազար 428.23 գրամ «մեթամֆետամին» տեսակի թմրամիջոց:
Հարուցվել է քրեական գործ, ներկայացվել է մեղադրանք. որպես խափանման միջոց է կիրառված կալանքը:
