Լեմկինի անվան Ցեղասպանության կանխարգելման միջազգային ինստիտուտն ԱՄՆ-ի, Գերմանիայի և Ֆրանսիայի առաջնորդներ Ջո Բայդենին, Օլաֆ Շոլցին և Էմանուել Մակրոնին կոչ է արել լրջորեն վերաբերվել Արցախում Հայոց ցեղասպանության սպառնալիքին։
«Ադրբեջանը մեզ փորձարկման է ենթարկում. Լեմկինի ինստիտուտը կոչ է անում աշխարհում իշխանություն ունեցողներին, հատկապես Բայդենին, Գերմանիայի կանցլերին և Էմանուել Մակրոնին լրջորեն վերաբերվել Արցախում Հայոց ցեղասպանության սպառնալիքին։ Աշխարհը չի կարող իրեն թույլ տալ մեկ այլ Հայոց ցեղասպանություն»,- ասվում է Լեմկինի ինստիտուտի թվիթերյան գրառման մեջ։
Գրառման մեջ նշվում է, որ Ադրբեջանը ձմռան կեսին հերթական անգամ խափանել է Արցախի գազամատակարարումն, իսկ էլեկտրամատակարարումն անհուսալի է։
«Ռուս խաղաղապահների միջնորդությամբ իրենց ընտանիքներին վերամիավորվող հայ երեխաների շարասյունը կասեցվել և տեռորի ենթարկվել է ադրբեջանցիների կողմից։ 37 օր շրջափակում»,- ասված է հաղորդագրությունում։
Լեմկինի ինստիտուտը զգուշացրել է, որ համաշխարհային առաջնորդները «շարունակելով աջակցել Ադրբեջանին՝ կդառնան ցեղասպանության մեղսակից»: