Ջերմուկում ճոպանուղին չի աշխատում Ադրբեջանի գնդակոծությունից հետո, ԱԺ ճեպազրույցում ասաց Վայոց ձորի մարզպետ Արարատ Գրիգորյանը։
«Հրթիռակոծության ժամանակ ճոպանուղին ամբողջությամբ վնասվել է, այժմ այն չի գործում, աշխատում ենք դրա գործունեությունը վերականգնելու ուղղությամբ»,- ասաց նա։
Գրիգորյանն ընդգծեց, որ այս պահին վտանգ չի տեսնում, եթե ճոպանուղու աշխատանքը վերականգնվի, սակայն չի բացառում հակառակորդի կողմից հնարավոր հարձակման ռիսկը։
Հայաստանի դեմ Ադրբեջանի ագրեսիայի մասին
Հայաստանի Ադրբեջանին սահմանակից շրջաններում (Սյունիքում, Գեղարքունիքում և Վայոց Ձորում) սեպտեմբերի 13-14-ը ադրբեջանական զինուժը լայնածավալ ագրեսիա է ձեռնարկել Հայաստանի ինքնիշխան տարածքի դեմ՝ կիրառելով խոշոր տրամաչափի զենքեր, հրետանի, հրթիռային համակարգեր և. անօդաչու սարքեր։
Ադրբեջանական զինուժը հրետակոծել է Հայաստանի 36 բնակավայր, այդ թվում՝ Գորիս, Սիսիան, Կապան, Ջերմուկ, Վարդենիս, Տեղ, Գեղամասար համայնքները, ինչի հետևանքով ամբողջությամբ կամ մասնակի այրվել է ավելի քան 190 բնակելի տուն, էներգետիկ ենթակառուցվածքներ, ջրամատակարարման օբյեկտներ, գազատարներ, կամուրջ և ավտոճանապարհներ։
Վերջին տվյալներով՝ հայկական կողմից զոհվել կամ անհետ կորել է 207 մարդ, այդ թվում՝ զոհվել է 4 խաղաղ բնակիչ, 2 խաղաղ բնակչի գտնվելու վայրը հայտնի չէ։ 293 զինծառայող և 8 խաղաղ բնակիչ վիրավորվել է, շուրջ 20 զինծառայող գերի ընկել։ Ապացույցներ կան ադրբեջանցիների կողմից գերի ընկած կամ վիրավորված հայ զինվորների խոշտանգումների, անդամահատման, և, այսպիսով՝ անօրինական սպանությունների դեպքերի մասին։