Վարչապետ Նիկոլ Փաշինյանն այսօր կառավարության նիստի սկզբին անդրադարձավ վերջին օրերի ողբերգական ավտովթարներին, որոնց արդյունքում մենք մեծ թվով զոհեր ունեցանք։
«Բոլորդ գիտեք, որ ոստիկանությունում օրենքի նոր նախագիծ է մշակվել, որի հիմնական նպատակը կարգազանց վարորդներին ընդհանրապես երթևեկությունից հեռացնելն է», - ասաց նա:
Վարչապետն ընդգծեց՝ նախագիծն Ազգային ժողովում է ու պետք է քննարկել հնարավորինս շուտ:
Փաշինյանը նկատեց, որ ավտոմեքենաների թիվը հանրապետությունում աննախադեպ ավելացել է, ներկրումները մեծ ծավալով շարունակվում են,և ոստիկանությունը պետք է ամենակոշտ միջոցները ձեռնարկի կարգազանց վարորդների նկատմամբ ու որևէ հանդուժողականություն չցուցաբերի:
ՀՀ ոստիկանության պետ Վալերիյ Օսիպյանը վստահեցրեց՝ բոլոր դեպքերով ոստիկանությունը ուսումնասիրություններ է իրականացնում:
Անդրադառնալով Զոդի կամրջի վրա տեղի ունենցած ողբերգական դեպքին՝ Օսիպյանն ասաց, որ կամրջի վրա անթույլատրելի է վազանց կատարել:
«Ես վստահեցնում եմ, որ մենք ամեն ինչ անում ենք, ճիշտ է, ասում եմ ամեն ինչ անում ենք, բայց չեմ բացառում, որ գործառույթների մեջ կան թերացումներ», - ասաց նա՝ ավելացնելով, որ ճանապարհատրանսպորտային պատահարները վերջին տասը տարում շարունակում են աճել, քանի որ ճանապարհները վատ են լուսավորված
«Օրինակ՝ 2018 թվականի ապրիլի 10-ի դրությամբ՝ գրանցվել է 1861 ՃՏՊ, 150 զոհ 2736 վիրավոր, իսկ 2019 թվականի նույն ժամանակահատվածում գրանցվել է 2203 ՃՏՊ, 169 զոհ, 3212 վիրավոր», - ներկայացրեց Օսիպյանը:
ՀՀ փոխվարչապետ Մհեր Գրիգորյանն էլ ասաց, թե ժամանակն է, որ տեխզննման ու ԱՊՊԱ-ի գործընթացը սինխրոնիզացնել:
«Կարծում եմ՝ դա ամենաարդյունավետ լուծումը կլինի, ի վերջո, այն մեքենան, որը չունի նորմալ տեխնիկական վիճակ, պետք է ապահովագրություն չստանա, կոչ եմ անում հանձնարարական տալ», - ասաց նա:
Վարչապետ Նիկոլ Փաշինյանին դուր եկավ առաջարկը:
Արմինե Գևորգյան