Երևանի քաղաքապետարանը մտադիր է մասնավոր օպերատորներին ներգրավել հասարակական տրանսպորտի աշխատանքի կազմակերպման գործում, ուրբաթ խորհրդարանում ասաց քաղաքապետ Հրաչյա Սարգսյանը։
«Այս պահին Տարածքային կառավարման և ենթակառուցվածքների նախարարության հետ նախապատրաստում ենք «Տրանսպորտի մասին» օրենքում փոփոխության նախագիծ, որպեսզի կարողանանք մասնավոր օպերատորներին ներգրավել տրանսպորտային երթևեկության կազմակերպման գործում»,- ասաց նա խորհրդարանական մշտական հանձնաժողովների համատեղ նիստում։
Սարգսյանը պարզաբանեց, որ առաջարկվող փոփոխություններով քաղաքապետարանը մասնավոր օպերատորներին վճարելու է յուրաքանչյուր կիլոմետր ճանապարհի համար, որպեսզի նրանք ստիպված չլինեն մտածել քաղաքացիներից միջոցներ ստանալու մասին։
«Այս պահին Երևանում տրանսպորտի խնդիր կա, որը մենք քայլ առ քայլ լուծում ենք, խնդրում եմ քաղաքացիներին մի քիչ էլ համբերել, և այս խնդիրը վերջնական լուծում կստանա»,- ասաց նա։
Սարգսյանը հիշեցրեց, որ անցած տարի քաղաքապետարանը ձեռք է բերել 211 նոր ավտոբուս, իսկ անցած ամիս պայմանագիր է կնքվել ևս 87 12 մետր երկարությամբ ավտոբուս գնելու վերաբերյալ։
«Հաջորդ շաբաթ նախատեսվում է մրցույթ հայտարարել 150 նոր ավտոբուսների ձեռքբերման համար, ակնկալում ենք, որ դրանք կստացվեն դեկտեմբերի վերջին»,- ասաց նա։
Սարգսյանը տեղեկացրեց նաև, որ ավելի վաղ հայտարարվել էր տոմսերի վճարման միասնական համակարգի մրցույթ, սակայն պայմանագրի կնքման հետ կապված խնդիրներ են առաջացել։
Նրա խոսքով, մեկ շաբաթվա ընթացքում հարցը կլուծվի, և մայրաքաղաքի երթուղիներից մեկում փորձնական ձևաչափով կգործարկվի անկանխիկ վճարումների համակարգը։