Նրանցից մեկը լրագրողների հետ զրույցում նշեց, որ հակառակ աջակցության խոստումների՝ կառավարությունից ոչ ոք մինչ օրս չի հետաքրքրվել իրենց խնդրով, ոչինչ չի արել, որպեսզի իրենք կարողանան մեկնել ՌԴ:
«Այսօր հավաքել ենք այստեղ, որ Նիկոլ Փաշինյանի հետ հանդիպենք, խոսենք, այս հարցը լուծենք: Ժողովուրդը մինչև հիմա արևի տակ վառվում է: Մենք ուզում ենք, որ մեզ մարդու տեղ դնեն: Վրացական կողմը մեզ պետք է մարդու, ոչ թե անասունի տեղ դնի, որ մեզ գցեն ավտոբուսների մեջ, թողնեն: Տրանզիտի հարցը պետք է լուծվի:
«Ես Ռուսաստանի քաղաքացի եմ, աշխատանքս, ընտանիքս այնտեղ է: Ռուսական կողմը չի էլ ուզում մեզ հետ խոսել, ես դիմել եմ ու պատասխան եմ ստացել, թե ինչի եք գնացել Հայաստան: Կառավարությունում ո՞վ կա, որ իջնի ու բան ասի մեզ»,-լրագրողների հետ զրույցում ասաց ՌԴ մեկնել ցանկացող քաղաքացիներից մեկը:
Նշենք, որ նրանք բողոքում են փակ սահմանների դեմ։ Նրանցից մի քանիսն անցած շաբաթ հրավիրվել էին Կառավարության անդամների հետ քննարկման, սակայն մինչև այսօր չեն ստացել իրենց խնդրի լուծումը:
Ակցիա իրականացնողներից մեկը նշեց, որ հանդիպել են արտգործնախարարի հետ, որն էլ ասել է, թե հարցի լուծումն այն է, որ պետք է նրանց ընտանիքներին ևս Հայաստան բերեն: «Իմաստը որն է, երբ դեպի ներս մարդկանց ընդունում են, իսկ դեպի դուրս չեն թողնում»:
«Ճիշտն ասած, այնքան եմ հիասթափվել մեր կառավարությունից… Մեզ ոչ մեկ մարդու տեղ չի դնում, սրտի ցավով տոմս եմ առել, ամսի 28-ին պիտի գնամ: Ով որ գնա, էլ հետ չի գալու: Բողոքի ակցիայի մասնակից տղամարդը շեշտեց՝ վարչապետն իրենց հետ ավելի վաղ ունեցած հանդիպումից հետո խոստացել է, որ կօգնի, սակայն խոստումն իրականություն չի դարձել:
«Մեզ շաշի տեղ են դնում, գլխներիս տակ փափուկ բարձ դնում: Եթե մարդկանց այսպես արհամարհեն, մարդիկ կգնան ու էլ հետ չեն գա: Սխալ բաներ են անում, եթե կառավարությունն իր օրենքները չի հարգում, ժողովուրդը ո՞նց հարգի: Այն կառավարությունը, որը սեփական ժողովրդին չի լսում, երկար կյանք չի կարող ունենալ: Այսպես չի կարելի, մարդկանց պետք է հարգել», - ասաց ցուցարարը:
ՌԴ մեկնել ցանկացողներից մեկն էլ ասաց, որ Հայաստանի դիմաց բոլորը դռները փակել են, որովհետև, օրինակ՝ Բելառուսի դեպքում նույն խնդիրը չառաջացավ: «Փաշինյանը, որ ընտրվում էր, այստեղ կանգնած ծափ էի տալիս, իսկ հիմա չի իջնում իր տեղից, կարմիր գիծ է գծել Հայաստանի վրա»:
Արմինե Գևորգյան