Առաջիկա օրերին Հայաստանում ավելի շատ բողոքի ակցիաներ են սպասվում, իսկ ընդդիմությունն ակնկալում է, որ մարդկանց կրիտիկական զանգվածը դուրս կգա փողոց։ Այս մասին լրագրողներին ասաց «Հայրենիք» կուսակցության նախագահ, «Պատիվ ունեմ» խմբակցության ղեկավար Արթուր Վանեցյանը։
«Ազգն արթնացել է, ժողովուրդն արդեն իր որոշումը կայացրել է, մնում է այս ամենը կարողանանք ճիշտ ձևավորել և հասցնել մինչև վերջ, առաջիկա օրերին էլ ավելի շատ բողոքի ակցիաներ կլինեն, ավելի դինամիկ և կարևոր։ Կարծում եմ, մեր հայրենակիցները կմիանան, և մենք կունենանք այն կրիտիկական զանգվածը, որին ոչ մի ուժ չի կարող դիմակայել»,- ասաց նա։
Վանեցյանը կարծում է, որ վարչապետ Նիկոլ Փաշինյանը չի կարող ուժ կիրառել ժողովրդի դեմ. Նրա խոսքով, եթե ընդդիմության կողմից սպասվող մարդկանց թիվը լինի, ապա այդ քայլն անհնարին կլինի։
«Ժողովրդի դեմ ոչ ոք ոչինչ չի կարող անել, ինչ վերաբերում է նրան, որ Փաշինյանը ոչ մի բանի առաջ կանգ չի առնելու, հավատացեք, մենք կորցնելու բան չունենք, մենք կորցրել ենք և շարունակում ենք կորցնել ամենաթանկը՝ մեր հայրենիքը, երկրի անվտանգությունը, երեխաներին»,- ասաց նա։
Այսօր Հայաստանում շարունակվում էին ընդդիմության ակցիաներն ընդդեմ իշխանության. փակվել են մայրաքաղաքի առանցքային ճանապարհները, հանրահավաքներ են տեղի ունեցել կառավարության շենքի մոտ, որտեղից բերման է ենթարկվել երկու ցուցարար, իսկ Տիգրանաշենից նույնպես մեկնարկել է բողոքի երթ դեպի Երևան։ Շարունակվում են նաև իրազեկման ակցիաները, որոնք իրականացնում են մայրաքաղաքի բուհերի ուսանողները։
Այս պահին Երևանում երկու բողոքի երթ է ընթանում՝ մեկը մեկնարկել է Սասունցի Դավթի հուշարձանի մոտից, երկրորդը՝ Ազատության հրապարակից։
Ապրիլի 17-ից ընդդիմությունը Հայաստանում բողոքի ցույցեր է անցկացնում գործող իշխանությունների քաղաքականության դեմ՝ հայտարարելով, որ այն սպառնում է Հայաստանի և Արցախի պետականությանը և անվտանգությանը։ Ապրիլի 25-ից այն անցել է փողոցային ապակենտրոնացված պայքարի։ Հայաստանի տարբեր մարզերից երթեր են մեկնարկել դեպի Երևան, որտեղ ընդդիմությունը մայիսի 1-ին նախատեսում է մեծ հանրահավաք անցկացնել։ Երկուշաբթի օրը Երևանում իշխանությունների հրաժարականի պահանջով երկու երթ է տեղի ունեցել, որոնցից մեկը կազմակերպել էր «Հայրենիք» կուսակցության նախագահ, «Պատիվ ունեմ» խմբակցության ղեկավար Արթուր Վանեցյանը, մյուսը՝ ՀՅԴ-ն։
Ավելի վաղ ՀՀ վարչապետ Նիկոլ Փաշինյանը խորհրդարանում հայտարարել էր, որ միջազգային հանրությունը կոչ է անում Հայաստանին իջեցնել նշաձողը Լեռնային Ղարաբաղի կարգավիճակի հարցում, հակառակ դեպքում չի կարողանա օգնություն ցուցաբերել հայկական կողմին։ Այս հայտարարությունը լայն արձագանք առաջացրեց ինչպես Հայաստանում, այնպես էլ Արցախում։