ՊՎԾ նախկին պետ Դավիթ Սանասարյանը այսօր բողոքի ակցիա իրականացնում էր այն դատարանի շենքի դիմաց, որտեղ նախօրեին կայացվել էր ՀՀ երկրորդ նախագահ Ռոբերտ Քոչարյանի խափանման միջոց կալանքը փոխելու որոշումը: Վերջինս լրագրողների հետ զրույցում ասաց, որ վարչապետի ելույթում տեսել է ծրագրային վերնագրերը ու վստահ է, որ այս ձևի մեջ բովանդակություն է լցվելու, և շուտով ունենալու ենք նոր Հայաստանի պահանջներին համապատասխանող ազատ, անկախ դատարան:
Դավիթ Սանասարյանն ընդգծեց նաև,որ վարչապետի նշած կետերը պետք է կյանքի կոչվեն և ժողովուրդը պետք է իմանա, թե որտեղից են դատավորների մի քանի միլիարդանոց տները, ինչպես են նրանք այլ երկրներում սեփականություն ձեռք բերել և այլն:
«Մենք վստահություն չունենք, որ այդ դատարանները իրենց նախկին տերերի կողմից չեն ենթարկվում ճնշումների, չեն իրականացնում նրանց պատվերները>>,-ասաց Սանասարյանը:
Հիշեցենք, որ պաշտոնական լիազորությունները չարաշահելու համար մեղադրանք է առաջադրվել Պետական վերահսկողական ծառայության (ՊՎԾ) պետ Դավիթ Սանասարյանին, և նրա նկատմամբ որպես խափանման միջոց է կիրառվել չհեռանալու մասին ստորագրությունը:
Արմինե Գևորգյան