Հայաստանի ԱԻ ծառայության փորձագետները շարունակում են ուսումնասիրել Երևանի “Դալմա Գարդեն մոլ” առևտրի կենտրոնում արտակարգ պատահարի պատճառները, հայտնել է գերատեսչության մամլո խոսնակ էդմոն Զարգարյանը։
Հինգշաբթի երեկոյան “Դալմա Գարդեն մոլ”-ում զգացվել են ցնցումենր, ինչից հետո տարհանվել են ԱԿ բոլոր աշխատակիցները և հաճախորդները։
Միաժամանակ, Հայաստանի սեկսմիկ ծառայությունը հերքել է հանրապետության տարածքում երկրաշարժի մասին լուրերը։
“Ներկա պահին ԱԻՆ աշխատակիցները շարունակում են զննել շենքը և հարակից տարածքները ցնցումների պատճառը պարզելու նպատակով։ Շենքում տեղադրված են սենսորային չափիչ սարքերը, որոնք կարող են գրանցել ցնցումների պատճառը դրանց կրկնվելու դեպքում։ Այս պահի դրությամբ նոր ցնցումներ չեն եղել”,- ասել է Զարգարյանը։
Ըստ նրա, մասնագետները ցնցումների ամենահավանական պատճառ են դիտարկում մարդկային գործոնը, մասնավորապես՝ անվտանգության կանոնների հնարավոր խախտումները։
“Դալմա Գարդեն մոլ”-ի տարածքում ոչ մի սեյսմիկ ակտիվություն չի գրանցվել, արտաքին գործոններ չկան”,- ասել է նա։
Միաժամանակ, Զարգարյանը նշել է, որ առևտրի կենտրոնի փլուզման վտանգ չկա, մանավանդ, որ այն շահագործման է հանձնվել 2012 թվականին քաղաքաշինության պահանջներին համապատասխան և պարբերաբար ստուգվում է։